Elorda stomatologııasyndaǵy daý: Dárigerler komadaǵy balanyń jaǵdaıyn aıtty
NUR-SULTAN. QazAqparat - QR Densaýlyq saqtaý mınıstrliginiń ókilderi stomatologııalyq klınıkaǵa barǵannan keıin es-tússiz halge túsken balanyń qazirgi jaǵdaıyn aıtty, dep habarlaıdy QazAqparat tilshisi.
«Onyń qansha ýaqyt jatatyndyǵyn eshkim aıta almaıdy. Barlyǵy balanyń aǵzasyna baılanysty. Mıynyń ólgendigi týraly dıagnoz qoıylǵan konsılıým sheshimi áli bolǵan joq. Qazir balanyń jaǵdaıyn jiti baqylap otyrmyz. Mundaı jaǵdaıda qajetti keńesshilerdi jumyldyrý arqyly kerekti barlyq terapııa sharalaryn júrgizip jatyrmyz. Onyń qansha ýaqyt jatatynyna, jaǵdaıy qalaı bolatynyna eshkim jaýap bere almaıdy. Bala der ýaqytynda emdeý sharalaryn alyp jatyr», - dedi búgin elordada ótken brıfıngte anestezıolog-reanımatolog Nurıla Maltabarova.
Onyń aıtýynsha, bala qansha ýaqyt baqylaýdy qajet etse, sonsha ýaqyt baqylaýda bolady.
«Bala qazirgi ýaqytta ekinshi táýlik №2 kópbeıindi balalar aýrýhanasynda jatyr», - dedi ol.
Buǵan deıin habarlanǵandaı, stomatologııaǵa tekserý jumystary keshe, 8 qańtar kúni aıaqtaldy. Birneshe zańbuzýshylyq anyqtaldy. Klınıkanyń qyzmetin toqtatý týraly sotqa materıaldar daıyndalmaq.
Eske salaıyq, elorda turǵyny Anastasııa Zelenaıa eki jarym jastaǵy balasy stomatologııalyq klınıkaǵa qaralǵannan keıin es-tússiz kúıge túskenin habarlaǵan bolatyn. Bala 10 táýlikten astam esin jııa almaı jatyr.
Oqıǵaǵa baılanysty Densaýlyq saqtaý mınıstri Eljan Birtanov túsinik berdi. «Jaǵdaıdy baqylaýymda ustap otyrmyn. Ókinishke qaraı, balanyń jaǵdaıy óte aýyr. Biraq, dárigerler tarapynan medıtsınalyq kómek barynsha kórsetilýde. Oǵan tolyqqandy deńgeıde járdem beriledi», - dedi mınıstr.
Sonymen birge, ol QR DSM Taýarlar men qyzmetter qaýipsizdigi jáne sapasyn baqylaý komıtetiniń tóraıymy Lıýdmıla Bıýrabekovaǵa atalmysh stomatologııalyq klınıkany tekserýdi tapsyrǵan edi.
