Elorda sotynda memlekettik tilge mán beriledi
ASTANA. 19 qańtar. QazAqparat - Astana qalalyq sotynyń qujat aınalymyna 2012 jyly 35623 qujat kelip tússe, onyń 22537-si, ıaǵnı 63,3 paıyzy memlekettik tilde boldy.
astana.kz saıtynyń habarlaýynsha, bul týraly elorda sottarynyń jumys qorytyndysy boıynsha ótkizilgen baspasóz máslıhatynda Astana qalasy sotynyń tóraǵasy Sáken Abdýllaev málim etken.
«Sot basqa da quqyq qorǵaý organdary, memlekettik mekemeler sııaqty jeke jáne zańdy tulǵalar talap-aryzdy qaı tilde berse, sot isterin de sol tilde qaraıdy. Oǵan bizdiń tolyq múmkindigimiz bar. Qazirgi bizde qyzmet etetin 130 sýdıanyń jartysynan astamy, ıaǵnı 60 paıyzǵa jýyǵy eki tildi, memlekettik jáne orys tilderin birdeı biledi. Sondyqtan isti eki tilde de óndiriske qabyldap, qaraýǵa tolyq múmkindigi bar», - dedi tóraǵa.
«Qazaqstan Respýblıkasynyń Prezıdenti N. Nazarbaevtyń ótken jylǵy halyqqa arnaǵan Joldaýyndaǵy memlekettik tilge qatysty alǵa qoıǵan mindetterdi júzege asyrý maqsatynda, 2013 jyly da memlekettik tildi damytýǵa qatysty birqatar jumystar atqarýdy josparlap otyrmyz», - dedi . S.Abdýllaev.
