Elorda soty maımylǵa qatysty iske núkte qoıdy
NUR-SULTAN. QazAqparat - Nur-Sultan qalasynda 6 jasar balany tistep alǵan maımyldyń isine qatysty sot sheshimi shyqty. Oqıǵa byltyr bolǵan. Alaıda, sot sheshimi jaqynda ǵana shyqty, dep habarlaıdy QazAqparat tilshisi.
Elorda sotynyń baspasóz qyzmetinen málim etkendeı, 2018 jyldyń qyrkúıek aıynda «Saryarqa» saýda, oıyn-saýyq ortalyǵynda ornalasqan zoobaqta maımyl 6 jastaǵy qyz balany tistep alǵan.
Sot-medıtsınalyq saraptama jumysynyń qorytyndysyna saı, denege túsken jaraqat - densaýlyqqa keltirilgen jeńil zaqym retinde aıqyndalǵan. Qyz balanyń ákesi zoobaqtan moraldyq shyǵyn óndirý úshin sotqa aryzdanǵan.
«Esil aýdandyq sotynyń sheshimimen aryz talaby ishinara qanaǵattandyryldy. Zoobaqtan moraldyq shyǵyn esebinde 50 myń teńge óndirilip alyndy», - delingen habarlamada.
Sot sheshimi kúshine engen joq.
