Elorda: Sol jaǵalaýda úılerdiń jertólesin sý basqan
NUR-SULTAN. QazAqparat – Búgin Nur-Sultan qalalyq máslıhaty Qurylys, ekologııa, kólik, saýda jáne turǵyn úı-kommýnaldyq sharýashylyq máseleleri jónindegi turaqty komıssııasynyń otyrysy ótti, dep habarlaıdy QazAqparat tilshisi.
Otyrysy barysynda Máńgilik el dańǵylynaǵy №35-úı Trıýmfaldy arka turǵyn keshenin, oǵan irgeles aýmaq pen úı-jaılardy sý basý máselesi talqylandy. Osy problemaǵa qatysty Esil aýdany ákiminiń orynbasary Qanat Abbas baıandama jasap, turǵyndarmen kún saıyn 2-3 ret kezdesý uıymdastyryp otyrǵanyn aıtady.
«Esil aýdanynda qurylysy jumystary qarqyndy júrgizilip jatyr. Sondyqtan da bul problema jyldar boıy qordalanyp qalǵan. Aýdanda bir ǵana kollektor bar jáne onyń barlyq turǵyn úılerge qyzmet kórsetýge shamasy jetpeıdi. Onyń ústine aýdanda erigen qar sý, káriz sýynyń 57 paıyzy osy kollektorǵa kelip quıylady. Sonyń saldarynan Máńgilik el, Álıhan Bókeıhan, Kereı men Jánibek handar, Saýran kósheleriniń boıyndaǵy úılerdiń jertólesin sý basqan», - dedi ol.
Onyń atap ótýinshe, sol jaǵalaýdaǵy problemany sheshý úshin uzyndyǵy 7,6 shaqyrymdy quraıtyn sý tazartý nysany salynady. Nysannyń jobasy, jobalyq-smetalyq qujattamasy, memlekettik saraptama qorytyndysy bar.
«Atalǵan nysan salynǵannan keıin problema sheshiledi ári aldaǵy ýaqytta mundaı másele týyndamaıdy»,- dedi Qanat Abbas.
