Elorda sáýleti taǵy bir ǵajaıyp arhıtektýralyq týyndymen tolyqty

Búgin elordada «Astana Opera» memlekettik opera jáne balet teatrynyń ashylýy barysynda Elbasy Nursultan Nazarbaev osylaı aıtty.

«Qymbatty otandastar, qadirli astana turǵyndary men qonaqtary! Búgin shymyldyǵy aıqara ashylatyn opera jáne balet teatry elimizdiń táýelsizdiginiń 22 jylyndaǵy 19-shy óner shańyraǵy bolyp sanalady. Buǵan deıin elimizdiń ár qıyrynda 18 jańa teatr salynyp, el ıgiligine berilgenin ózderińiz bilesizder. Astanaǵa alǵash qonys aýdarǵan kezde tuńǵysh ret biz Kúlásh Baıseıitova atyndaǵy opera jáne balet teatryn jasadyq, kadrlar daıarladyq»,-dedi Elbasy.

Memleket basshysy óz sózinde buǵan deıin elordada biregeı Beıbitshilik jáne kelisim saraıy, Táýelsizdik saraıy, Qazaqstan kıno-kontsert zaly boı kóterip, el ıgiligine aınalǵandyǵyn basa aıtty.

«Mine, olardyń qatary taǵy bir teńdesi joq arhıtektýralyq týyndymen tolyǵyp otyr. Syrtqy sán-saltanaty men ishki jabdyǵy ádemi úılesken «Astana Opera» teatryn bizge buryn armandaýdyń ózi arman bolatyn. Barshańyzdy el ómirindegi qazaqtyń tarıhyndaǵy osynaý jańalyqpen shyn júrekten quttyqtaımyn»,-dedi N. Nazarbaev.