Elorda polıtsııasy turaqqa qoıý erejesin buzǵan 53 kólikti kommýnaldyq turaqqa qoıdy
ASTANA. KAZINFORM – Elordada júrgizýshiler arasynda kólik tártibin arttyrýǵa jáne jol-kólik oqıǵalarynyń deńgeıin tómendetýge baǵyttalǵan keshendi sharalar júıeli túrde júzege asady. Osyǵan oraı, qala aýmaǵynda «Turaq» jedel-profılaktıkalyq is-sharasy ótti. Onyń nátıjesi týraly elordanyń Kommýnıkatsııalar qyzmetinde ótken brıfıngte Astana qalasy Polıtsııa departamentiniń Ákimshilik polıtsııa basqarmasy bastyǵynyń orynbasary, polıtsııa podpolkovnıgi Mahambet Tóleshov aıtyp berdi, dep habarlaıdy elorda ákimdiginiń resmı saıty.
Іs-sharanyń negizgi maqsaty – kólik quraldaryn toqtatý jáne turaqqa qoıý qaǵıdalaryn buzý faktilerin anyqtaý, ıaǵnı kólik pen jaıaý júrginshiler qozǵalysyna kedergi keltiretin jaǵdaılardyń aldyn alý.
Polıtsııa qyzmetkerleri tyıym salynǵan oryndarǵa - trotýarlarǵa, jaıaý júrginshiler ótkelderine, qoǵamdyq kólik aıaldamalaryna, sondaı-aq arnaıy tehnıkanyń júrýine kedergi keltiretin aýlalarǵa kólik qoıý derekterine erekshe nazar aýdardy. Sonymen qatar jol belgileri men tańbalardyń talaptaryn saqtamaý, manevr jasaý, qıylystar men jaıaý júrginshiler ótkelderinen ótý erejelerin buzý sııaqty basqa da quqyq buzýshylyqtardyń joly kesilgen.
«Іs-shara aıasynda jolaýshylardy tasymaldaý talaptarynyń saqtalýy da tekserildi. Júrgizýshilerge qaýipsizdik beldigin taǵý jáne balalarǵa arnalǵan arnaıy ustap turý qurylǵylaryn mindetti túrde qoldaný qajettigi túsindirildi.
Profılaktıkalyq jumys tek baqylaýmen shektelmeı, jol-kólik oqıǵalaryn azaıtýǵa baǵyttalǵan túsindirý sharalarymen qatar júrgizildi.
Quqyq buzýshylyqtardyń aldyn alý jáne avtokólikterdi evakýatsııalaýǵa jol bermeý maqsatynda júrgizýshilerge turaq erejeleri túsindirildi. Atap aıtqanda, kólik quraldary tek jol belgileri men tańbalarymen belgilengen arnaıy oryndarǵa ǵana qoıylýy tıis. Bul talaptardy buzý ákimshilik jaýapkershilikke ákeledi. Aıyppul salýdan bastap, avtokólikti kommýnaldyq turaqqa evakýatsııalaýǵa deıingi sharalar qarastyrylǵan», – deıdi ol.
Іs-shara qorytyndysy boıynsha jol júrisi qaǵıdalaryn buzýdyń 1500-den astam deregi tirkelgen. Olardyń basym bóligi jol belgileri men tańbalaryn saqtamaýǵa qatysty. Barlyǵy 685 jaǵdaı anyqtaldy.
Sondaı-aq, kólikti toqtaý jáne turaqqa qoıý erejelerin buzý boıynsha 700-den astam derek tirkelgen. Eń jıi kezdesetin quqyq buzýshylyqtar qatarynda trotýarlarda, balalar jáne sport alańdarynda, joldyń júrý bóligine kólik quraldaryn qoıý faktileri bar.
Jyl basynan beri elordada turaqqa qoıý erejelerin saqtamaý boıynsha 56 500-den astam ákimshilik hattama tirkelgen. Onyń ishinde 11 900-den astamy kólikti toqtatý jáne turaqqa qoıý talaptaryn buzýǵa qatysty.
«Turaq» jedel-profılaktıkalyq is-sharasy aıasynda 53 kólik quraly kommýnaldyq turaqqa qoıylyp, 922 avtokóliktiń memlekettik tirkeý nómirleri alynyp, paıdalanýǵa tyıym salyndy. Qabyldanǵan sharalar júrgizýshilerdiń jaýapkershiligin arttyrýǵa jáne qaıtalama quqyq buzýshylyqtardyń aldyn alýǵa baǵyttalǵan.
Sonymen qatar profılaktıkalyq jumystar da qolǵa alynyp, jol qozǵalysyna qatysýshylar úshin túsindirý aktsııalary uıymdastyrylǵan. Jadynamalar men aqparattyq býkletter taratyldy. Jol júrisi erejesi týraly beınerolıkter qoǵamdyq kólikterde, turǵyn úı keshenderiniń lıftilerinde jáne iri saýda-oıyn-saýyq ortalyqtarynda kórsetilip jatyr», – deıdi spıker.
Polıtsııa jol qozǵalysy erejelerin saqtaý - árbir azamattyń mindeti ári joldaǵy qaýipsizdiktiń basty kepili ekenin eskertedi.
Buǵan deıin Almatyda avtoturaq erejelerin buzǵan 15 myń júrgizýshi aıyppul arqalaǵanyn jazǵanbyz.
