Elorda polıtsııasy qaladaǵy vandalızmniń 70 deregin tirkedi
ASTANA. KAZINFORM – Elordada quqyq qorǵaý organdary bótenniń múlkin búldirý derekterin anyqtaý jáne jolyn kesý baǵytynda júıeli túrde jumys júrgizip keledi. Negizgi basymdyq quqyqbuzýshylyqtardyń aldyn alýǵa jáne qala ınfraqurylymy nysandaryna uqypty qaraý mádenıetin qalyptastyrýǵa berilip otyr, dep habarlaıdy Astana ákimdiginiń resmı saıty Polıtsııa departamentine silteme jasap.
Qala boıynsha beınebaqylaý kameralary ornatylyp, qoǵamdyq oryndarǵa turaqty monıtorıng júrgiziledi.
Polıtsııa qyzmetkerleri turǵyndarǵa túsindirý jumysyn da belsendi atqaryp jatyr. Atap aıtqanda, daýys zoraıtqysh qurylǵylar men drondar arqyly qoǵamdyq tártipti saqtaý jáne ortaq múlikke uqypty qaraý qajettigi eskertiledi.
Jyl basynan beri elorda polıtsııasy qaladaǵy múlikti búldirýdiń shamamen 70 deregin tirkegen. Kóbine aıaldama pavılondary, oryndyqtar, qoqys jáshikteri jáne jarnamalyq qurylymdar zaqymdanady. Sonymen qatar turǵyn úılerdiń kireberisterindegi beınekameralar men lıft jabdyqtaryn búldirý jaǵdaılary da jıi kezdesedi.
Polıtsııa bóten múlikti qasaqana búldirgeni úshin zańnamaǵa sáıkes jaýapkershilik qarastyrylǵanyn qaperge salady. Kináli tulǵalar keltirilgen shyǵyndy ótep, aıyppul tóleýi nemese ákimshilik qamaýǵa alynýy múmkin.
Polıtsııa departamenti azamattardy mundaı jaǵdaılarǵa beıjaı qaramaýǵa shaqyrady. Vandalızm faktileri anyqtalǵan jaǵdaıda «102» nómirine dereý habarlaý qajet. Sondaı-aq óskeleń urpaqty tárbıeleýge, qorshaǵan ortaǵa jáne ortaq múlikke qurmetpen qaraý mádenıetin qalyptastyrýǵa erekshe kóńil bólý mańyzdy.
Buǵan deıin Astanada múlikti qasaqana búldirgen 20 adam jaýapqa tartylǵanyn jazǵanbyz.
