Elorda polıtsııasy 10 dron keshenin 83,5 mln teńgege jalǵa almaq
ASTANA. KAZINFORM – Astana qalasynyń PD «Biryńǵaı drondar ınfraqurylymy» jobasy aıasynda pılotsyz avıatsııalyq júıelerdi (PAJ) jalǵa alý jónindegi qyzmetterdi memlekettik satyp alý boıynsha konkýrs ótkizip jatyr. Bul jóninde vedomstvo resmı saýalymyzǵa joldaǵan jaýabynda málimdedi.
– Elorda polıtsııasynda DJI Mavic 2 zoom drony bar, ol 2021 jyly 1 007 876 teńgege satyp alynǵan. Aldaǵy ýaqytta 10 dana dron kesheni jalǵa alynady, quny – 1 jylǵa 83 566 496 teńge. Sondaı-aq qurylǵylardy basqarý jáne úılestirýge arnalǵan ortalyqtandyrylǵan júıe engiziledi, - dep málimdedi vedomstvo resmı jaýapta.
Málimetke saı, bul aqyǵa tómendegi qurylǵylar men qyzmetter kiredi:
• Beınebaqylaýǵa arnalǵan jabdyǵy bar 10 dron;
• Árbir dronǵa arnalǵan dronoport. Ár dronoporttyń derekterdi taldaý júıesi, qaýipsizdik kameralary bolady. Onda drondar belgilengen keste boıynsha avtomatty túrde ushyp-qonady, saqtalady, qýat alady;
• Drondy basqarýǵa jáne dronnan Polıtsııa departamentiniń Jedel basqarý ortalyǵyna tikeleı translıatsııa jasaýǵa arnalǵan avtomattandyrylǵan jumys orny;
• Ushýdy basqarý ortalyǵy. Ol serverlik jabdyǵy jáne barlyq drondy biryńǵaı basqarý platformasy bar arnaıy baǵdarlamany qamtıdy;
• Derekterdi saqtaý serverindegi syıymdylyq. Ár pılotsyz avıatsııalyq júıeden alynǵan beınederek keminde 30 táýlik saqtalady;
• Drondardy táýlik boıy basqaryp, baqylaıtyn keminde 5 operator. Arnaıy sertıfıkaty bar ár mamanǵa 2 dronnan keledi;
• Jaldaý merziminde júıeniń barlyq elementteriniń úzdiksiz jumys isteýin qamtamasyz etetin tehnıkalyq qoldaý jáne qajet bolǵan jaǵdaıda jabdyqty aýystyrý;
• Pılotsyz avıatsııalyq júıeler salasyndaǵy QR zańnamasyn qyzmet kórsetýshilerdiń saqtaýy (qajetti ruqsattardy, lıtsenzııalardy, sertıfıkattardy alý).
Elorda polıtsııasynyń málimetinshe, atalǵan jobanyń maqsat-mindeti men tıimdiligi zor.
• Saıabaqtardy, bazarlardy, qala mańy men basqa da qaýip-qateri joǵary aımaqtardy áýeden patrýldeý, qaldyqtardy tastaý, kólderdi lastaý, sondaı-aq mýnıtsıpaldyq jerlerden topyraqty zańsyz shyǵarý faktilerin anyqtaý;
• Áýeden baqylaý arqyly jerdegi patrýldeý júktemesin azaıtý;
• Quqyq buzýshylyqtar men ákimshilik teris qylyqtardy (jappaı tóbeles, urlyq, jol qaýipsizdigi erejelerin buzý jáne t.b.) beınetirkeý;
• Jol-kólik oqıǵasy ornynan 3D model jasaý;
• Buqaralyq, merekelik jáne sporttyq is-sharalardy ótkizý kezinde qoǵamdyq tártipti saqtaýǵa atsalysý;
• «102» arnasy jáne beınebaqylaý kameralary arqyly kelip túsken habarlamalardy meılinshe qysqa ýaqytta qarastyrý;
• Beıneaǵymdy QR ІІM-niń qoldanystaǵy beıneanalıtıka platformasyna jınaý jáne derekterdi polıtsııanyń jaǵdaıattyq ortalyǵyna jiberý.
Sondaı-aq Polıtsııa departamenti mundaı keshendi satyp alǵannan góri jalǵa alý tıimdi ekenin atap ótti.
Aıta keteıik buǵan deıin polıtsııa drondary myńdaǵan quqyqbuzýshylyqty áshkerelegenin habarlaǵanbyz.
