Elorda polıtsııasy táýliktiń qaı ýaqytynda qylmys kóp jasalatyndyǵyn aıtty
NUR-SULTAN. QazAqparat - Elordada túngi saǵat 1-den tańǵy 6-ǵa deıingi aralyqta qylmys kóp jasalady. Bul týraly búgin Nur-Sultan qalalyq jergilikti polıtsııa qyzmeti basqarmasynyń bastyǵy Tahır Ábdirahmanov aıtty, dep habarlaıdy QazAqparat tilshisi.
«Aǵymdaǵy jyldyń birinshi toqsanynda qala aýmaǵynda tirkelgen qylmystardyń 119 faktisi alkogolge mas kúıde jasalǵan. 36 quqyq buzýshylyq kezinde kúdiktiler kóńil kóterý oryndarynda alkogoldi ishimdik ishken», dedi ol Nur-Sultan qalalyq kásipkerlerdiń quqyǵyn qorǵaý jáne sybaılas jemqorlyqqa qarsy is-qımyl keńesiniń otyrysynda.
Onyń dereginshe, elordada túngi saǵat 1-den tańǵy 6-ǵa deıingi aralyqta qylmys kóp jasalady.
«Máselen, osy jyldyń 14 naýryzynda tańǵy saǵat 5-te «Hıty HH veka» túngi klýbynyń janynda oryn alǵan jappaı tóbeles kezinde azamat A-ǵa bel tusynan pyshaq urǵan. 31 naýryzda saǵat 04-30-da azamat B-ǵa «Zoloto» meıramhanasynyń janynda keýde tusynan birneshe márte pyshaq salǵan», - dedi Tahır Ábdirahmanov.
Aıta keterligi, otyrys barysynda elordadaǵy dámhana, meıramhanalarda saǵat 23-00-den tańǵy saǵat 8-00-ge deıingi aralyqty alkogol ónimderin satýǵa shekteý qoıýǵa qatysty másele talqylandy.
