Elorda polıtsııasy sáni men saltanaty kelisken toıdyń ótýine tosqaýyl qoıdy
NUR-SULTAN. QazAqparat - Elordada 90-ǵa jýyq qonaq bolǵan úılený toıyn uıymdastyrýshylar ákimshilik jaýapkershilikke tartyldy, dep habarlaıdy QazAqparat tilshisi.
Nur-Sultan qalalyq polıtsııa departamentiniń málimetinshe, senbi kúni «102» pýltine qala turǵyndarynyń biri habarlasyp, «DiLu Plaza» meıramhanasynyń karantın rejımin buzyp jatqandyǵyn aıtqan. Tekserý barysynda atalǵan fakti rastaldy. «DiLu Plaza» meıramhanasynda sáni men saltanaty kelisken toı shamamen 90 qonaqtyń qatysýymen ótip jatqan.
Polıtsııa qyzmetkerleri merekeni uıymdastyrýshylar «tós qaǵystyrý» rásimin ótkizý sátine tap boldy. Sharany uıymdastyrýshy 47 jastaǵy áıel men meıramhananyń 37 jastaǵy ákimshisi karantın rejımin buzǵany úshin ákimshilik jaýapkershilikke tartyldy.
Nur-Sultan qalalyq polıtsııa departamenti karantın sharalarynyń kúsheıtilgendigin eske salyp, azamattarǵa rejım buzǵandar qoldanystaǵy zańnamaǵa sáıkes jaýapqa tartylatyndyǵyn eskertip otyr.
