Elorda polıtsııasy kúsheıtilgen rejımdegi jumysqa kóshpek

Bul týraly Nur-Sultan qalasy polıtsııa departamentiniń baspasóz qyzmeti habarlady.

«Jańa oqý jylynyń bastalýy qarsańynda balalardyń jol-kólik oqıǵasy saldarynan jaraqattanýynyń aldyn alý, kósheler men joldarda balalardyń qaýipsiz júris-turys daǵdylaryn bekitý úshin astana aýmaǵynda «Nazar aýdaryńyz – balalar!» sharasy ótkiziledi. Jol qozǵalysynyń kishkentaı qatysýshylaryna kómek kórsetý úshin mektepterdiń janynda jáne balalardyń jıy júretin oryndarynda oqý kezeńinde patrýldeıtin polıtsııa jasaqtary qoıylady. Polıtsııa qyzmetkerleri birinshi synyptar arasynda oqý jylynyń bastalýyna arnalǵan saltanatty jıyndarǵa qatysady. Oqýshylarǵa jol qozǵalysy erejeleri men karantındik sharalardy saqtaı otyryp, olardy qoldaný daǵdylaryn pysyqtaý boıynsha teorııalyq jáne praktıkalyq sabaqtar ótkiziledi», - deıdi jergilikti polıtsııa qyzmetiniń bastyǵy Arman Aıtmaǵambetov.

Sondaı-aq, elordalyq polıtsııa qyzmetkerleri múddeli qyzmettermen birlesip 203 bilim oshaǵyna irgeles aýmaqta jol qozǵalysyn retteýge qajet baǵdarsham, jol belgileri sııaqty quraldardyń jumysyna taldaý júrgizipti.

«Jelige jaýaptylardyń atyna kemshilikter boıynsha 152 uıǵarym berildi. 183 jaıaý júrginshiler ótkelinde jol belgileri salyndy. 87 jol belgileri ornatylyp, aýystyryldy, 410 metr jaıaý júrginshi joldary salyndy, 46 jasandy kedir-budyrlyq ornatyldy. 169 metr jasandy jaryq qalpyna keltirildi. 34 mektep avtobýsynyń tehnıkalyq jaı-kúıiniń qaýipsiz paıdalaný talaptaryna sáıkestigi turǵysynan tekserý júrgizildi. Júrgizýshilerine balalardy otyrǵyzý jáne túsirý kezinde erejeni saqtaý týraly áńgime júrgizildi. Jedel aldyn alý is-sharasy kezinde balalardy tasymaldaý erejelerin buzýdyń 215 faktisi tirkeldi. Jyl basynan beri elorda aýmaǵynda jol-kólik oqıǵalarynyń saldarynan 47 kámeletke tolmaǵan bala zardap shegip, bir bala kóz jumdy», - dep jazady departamenttiń baspasóz qyzmeti.