15:30, 21 Tamyz 2019 | GMT +6
Elorda polıtsııasy qalta urylarynyń fotolaryn jarııalady
NUR-SULTAN. QazAqparat – Nur-Sultan qalasynyń Polıtsııa departamenti qoǵamdyq oryndarda jıi bolatyn qalta urlyqtary týraly eskertip, izdeýde júrgen qylmyskerlerdiń fotolaryn jarııalady, dep habarlaıdy QazAqparat.
«Júrgizilip jatqan jedel-izdestirý jáne profılaktıkalyq is-sharalardyń nátıjesinde ótken jylmen salystyrǵanda qalta urlyǵy 36 paıyzǵa tómendedi. Azamattardyń belsendiliginiń arqasynda jáne polıtseılerdiń jedel-izdestirý sharalarynyń nátıjesinde qalta urlyǵyn jasaǵan 7 adam sottaldy, 26 kúdikti ýaqytsha ustaý ızolıatoryna jetkizildi, 11 adamnan eshqaıda ketpeý týraly qolhat alyndy jáne 3 adam - úı qamaýynda», - delingen taratylǵan aqparatta.
Osy rette, Polıtsııa departamenti izdeýde júrgen kúdiktilerdiń fotosyn jarııalap, qandaı da bir málimetke ıe azamattardy 8(7172)71 61 71, +7 708 904 94 98 nemese «102» nómirine habarlasýdy surady.
