Elorda polıtsııasy izdeý salǵan jigittiń denesi tabyldy
NUR-SULTAN. QazAparat – Nur-Sultan qalalyq Polıtsııa departamenti izdeý salǵan azamattyń denesi tabyldy. Bul týraly qalalyq departamenttiń baspasóz qyzmeti habarlady.
Baspasóz málimetterine qaraǵanda, bıylǵy jyldyń 20-shy qyrkúıeginde saǵat 13-30-da Polıtsııa departamentiniń ókilderi «Qarqaraly» tasjolynyń boıynda, «Qosshy» aýylyna jaqyn jerden iz-túzsiz joǵalyp ketken Ánýar Tólegenuly Baızurovtyń denesin tapty. Týystary máıittiń Ánýar Baızurovtiki ekenin rastady.
6 qyrkúıek kúni úıinen shyǵyp ketip, qaıtyp oralmaǵan Á.T.Baızurovty izdestirýge elordalyq Polıtsııa departamentiniń jeke quramy jumyldyrylǵan.
Máıitti tekserý barysynda zorlyq-zombylyq belgileri tabylmady. Aldyn ala boljam boıynsha, marqum asylýdyń saldarynan tynys alý joldarynyń asfıktsııasynan kóz jumǵan.
Atalǵan fakt boıynsha qajetti sot-medıtsınalyq saraptamalar taǵaıyndaldy.
QR QK-niń 105 baby negizinde sotqa deıingi tergeý bastaldy.
