Elorda polıtsııasy bıik úıdiń shatyrynan sekirmek bolǵan jigitti qutqaryp qaldy

«Nur-Sultan qalalyq polıtsııa departamentiniń Jedel basqarý ortalyǵyna elorda turǵynynan Otyrar kóshesindegi 13 qabatty úıdiń shatyrynda bir adamnyń otyrǵany jáne sekirmekke árekettenip jatqany týraly habarlama tústi. Oqıǵa ornyna Patrýldik polıtsııa polkiniń polıtsııa kapıtany Erkebulan Jankebaev pen aǵa leıtenant Kenjebek Nurǵaısenov jiberildi», - delingen departament aqparatynda.

Vedomstvo málimetinshe, oqıǵa ornyna 5 mınýtta jetken saqshylar úıdiń shatyryna kóterilip, sekirmek bolyp otyrǵan jigitti kórgen. Al polıtsııa qyzmetkerlerin baıqaǵan jigit olarǵa jaqyndasa sekirip ketetindigin aıtyp, qoqan-loqy jasaǵan. Jigittiń kóńilin aýlap, ýaqyt utý úshin Kenjebek Nurǵaısenov ony áńgimege tartqan. Áńgimelesý barysynda mas kúıdegi 28 jastaǵy jigittiń birge turatyn kelinshekpen renjisip qalǵany belgili bolǵan. Polıtseıler jigitti raıynan qaıtaryp, tómenge aman-esen túsirdi jáne oǵan psıhologııalyq kómek kórsetildi.

«Jigittiń nazaryn basqa jaqqa aýdaryp, aqylǵa kelýge, otbasylyq janjaldyń árkimde bolatyndyǵyn jáne ol ómirińdi qııýǵa sebep emes ekendigin aıtyp kóndirýge tyrystyq», - dedi Erkebulan Jankebaev.