Elorda polıtsııasy azamattarǵa muqııat bolýdy eskertedi
ASTANA. QazAqparat - Elorda polıtsııasy azamattardy muqııat bolýlaryn suraýda. Bul týraly búgin «QazAqparat» agenttigine Astana qalasy ІІD baspasóz qyzmeti habarlady.
Elordalyq ІІD-niń habaryna sáıkes, qoǵamdyq tártip qaýipsizdigi qatań baqylaýda tur. Astanada áli kúnge deıin lańkestik qaýpiniń «sary» deńgeıi saqtalýda.
«Qurmetti elorda turǵyndary men qonaqtary! Polıtsııa qyzmetkerleriniń tekseristerine túsinistikpen qarap, olarǵa meılinshe járdemdesýge tyrysyńyzdar. Sómkege, qorapqa, oralǵan zattarǵa, qaptarǵa, chemodandarǵa, sonymen qatar symdary bar tehnıkalyq qurylǵylarǵa jáne qoǵamdyq oryndar men qoǵamdyq kólikte ózderin kúdikti ustaıtyn azamattarǵa úlken mán berýlerińizdi suraımyz. Kúdikti zatty saqtaýǵa jáne jetkizip berýge kelispeńizder. Tastap ketken zattarǵa azamattarǵa jaqyndamaýlaryn túsindirińizder. Eldegi jaǵdaı týraly jańalyqtardan baqylap otyrý lázim. Qatty úreıge berilmeńizder. Messendjerler men áleýmettik jelilerdegi jalǵan ósekke senbeńizder. Aldyn ala jalǵan aqparatty taratý qylmystyq qýdalaýǵa jatady. Kúdikti zattardy anyqtaǵan bolsańyzdar dereý 102 nómirine nemese Astana qalasy ІІD-niń telefondaryna habarlasyńyzdar: 71-60-10, 71-61-10», - dep jazady Astana qalasy ІІD baspasóz qyzmeti.
