Elorda polıtsııasy aıyppuly tólenbegen júrgizýshilerge eskertý jasady

NUR-SULTAN. QazAqparat - Jol qozǵalysy erejelerin buzýshylyqtardy jedel anyqtaý maqsatynda Іshki ister mınıstrligi «Qorgau» arnaıy mobıldi qosymshasyn ázirledi, dep habarlaıdy QazAqparat Astana qalalyq Polıtsııa departamentiniń baspasóz qyzmetine silteme jasap.

Baspasóz qyzmetiniń málimetterine qaraǵanda, elordada bıylǵy 26 sáýirden bastap Іshki ister mınıstrliginiń jol qozǵalysyn basqarýdyń avtomattandyrylǵan júıesi iske qosyldy.

«Qorgau» mobıldik qosymshasy arqyly Astana polıtseıleri kún saıyn ákimshilik quqyq buzýshylyq boıynsha boryshker júrgizýshilerdi anyqtaıdy. Máselen, joba iske qosylǵan sátten bastap elordada ákimshilik quqyq buzýshylyqtar boıynsha 791 mln. teńgeden astam somaǵa bereshegi bar 5 835 júrgizýshige eskertý jasaldy.

Bıylǵy qyrkúıek aıynda polıtseıler 1 mln. teńgeden astam somaǵa tólenbegen aıyppuldary bar «VAZ» jáne «Rendj Rover» markaly avtokólikteriniń júrgizýshilerin ustady. Júrgizýshilerge habarlama berilip, avtokólikter kommýnaldyq turaqqa ornalastyryldy.

Sonymen qatar, jalǵan nómirlermen kólikti basqarǵany úshin 91 júrgizýshi ustaldy, 448 azamat kólikti basqarý quqyǵynsyz jáne 175 júrgizýshi kólik quralyn basqarý quqyǵynan aıyryldy. Kommýnaldyq turaqqa 691 avtokólik qoıylyp, 810 memlekettik nómirlik belgi tárkilendi.

ІІM-niń «Qorǵaý» mobıldik qosymshasynda «Sergek» júıesi kameralarynyń múmkindikteri biriktirilgen. Kameralar kólik quralynyń jol erejesin buzǵanyn anyqtaǵan kezde elektrondy planshet arqyly patrýldik polıtsııa ınspektoryna birden sıgnal beredi. Qosymshanyń negizgi fýnktsııalarynyń biri qaýipti júrgizýshilerdi anyqtaý bolyp tabylady.

«Sergek» kameralary arnaıy algorıtmderdiń kómegimen joldarda apatty jaǵdaı týǵyzatyn júrgizýshilerdi anyqtaıdy. Mundaı avtokólikter týraly aqparat «102» operatoryna da beriledi. Qosymsha berilgen radıýsta jol erejesin buzǵan avtokóliktiń ornalasqan jerin kórsetedi. Polıtsııa qyzmetkeri jedel-aldyn alý is-sharalaryn júrgizý kezinde mundaı kólikti toqtatyp, JKO jasaǵanǵa deıin sharalar qoldana alady.

«Sonymen qatar, «Qorgau» qosymshasy qasaqana tártip buzýshylar men júrgizýshi kýáliginen aıyrylǵan adamdardy, sondaı-aq izdeýde júrgen avtokólikterdi anyqtaýǵa múmkindik beredi»,-delingen Astana qalalyq polıtsııa departamentiniń baspasóz baıanynda.