Elorda polıtsııasy 500 myń dollardyń brıllıant saqınasyn izdegenderge qatysty túsinik berdi

Astana qalalyq polıtsııa departamentine elordadaǵy saýda ortalyqtarynyń birinde quny 500 myń dollar turatyn brıllıant saqınany joǵaltý faktisi týraly aryz túsken joq, dep habarlaıdy QazAqparat tilshisi.

Toqtala ketsek, áleýmettik jelilerde qymbat zergerlik buıymdy izdep jatqan adamdardyń is-áreketi taspalanǵan vıdeo jarııalandy. Onda baıandalǵandaı, qyzmetkerler «Han-Shatyr» saýda ortalyǵyndaǵy jasandy jaǵajaıdyń qumyn súzgiden ótkizip, saqınany izdegen.

«Oıyn-saýyq jáne saýda ortalyǵynda quny 500 myń dollar turatyn saqınany joǵaltý faktisi boıynsha polıtsııaǵa aryz túsken joq. Aqparat shyndyqqa janaspaıdy», - delingen Astana qalasy polıtsııa departamentiniń baspasóz qyzmetiniń jaýabynda.

QazAqparat redaktsııasy atalǵan beınematerıalda baıandalǵan jaǵdaıdyń mán-jaıyn anyqtaý maqsatynda saýda ortalyǵynyń ákimshiligine resmı hat joldady.