Elorda polıtseılerine COVID-19 ınfektsııasyna qarsy vaktsına salynyp jatyr
NUR-SULTAN. QazAqparat-Búgin Nur-Sultanda polıtsııa qyzmetkerlerine ekpe jasalýda, dep habarlaıdy qala ákimdiginiń resmı saıty.
Qalanyń Polıtsııa departamenti emhanasynyń terapevt dárigeri Aıdana Ábdipattanyń aıtýynsha, qazir «Spýtnık V» vaktsınasyn alýǵa ýchaskelik polıtseıler men ishki ister salasynyń ardagerleri kelip jatyr.
«Olar halyqpen tikeleı jumys isteıtindikten ekpe alýǵa ózderi kelýde. Biz medıtsınalyq talapqa saı, vaktsına salý jaıly olarǵa túsindirip, tanystyryp jatyrmyz. Talabymyzǵa sáıkes qarap, baqylap, sosyn ǵana jumysymyzǵa kirisemiz. Búginge deıin qarsy kórsetkishter bolǵan emes. Bizde bári talapqa saı júrgiziledi», – dedi Aıdana Ábdipatta.
Ekpe jasatqandardyń biri – Nur-Sultan qalasy patrýldik polıtsııa ınspektory, aǵa leıtenant Sáken Tasqyn.
«Búgin men vaktsına saldyrdym. Densaýlyq jaǵdaıym da, kóńil-kúıim de jaqsy. Halyqpen jumys istep júrgendikten óz erkimmen ekpe salǵyzdym», – dedi Sáken Tasqyn.
