Elorda polıtseıleri zeınetkerlerdiń qaryn kúrep, turmysyna qolǵabys kórsetýde
NUR-SULTAN. QazAqparat – Nur-Sultan qalasynyń tártip saqshylary jeke sektorda turatyn zeınetkerlerdiń qaryn kúrep, jasy úlken kisilerge qolǵabys kórsetip jatyr. Qys qaharyna mingen shaqta muqtaj adamdarǵa kómektesýdi quqyq qorǵaýshylar óz paryzy dep sanaıtyndaryn aıtady, dep habarlaıdy QazAqparat tilshisi.
Quqyq qorǵaýshynyń eń birinshi mindeti – qoǵamdaǵy tártipti saqtap, quqyqbuzýshylyqtar men qylmystardyń aldyn alý, azamattarǵa nemese qoǵamǵa qaýip tóndirgen adamnyń áreketiniń jolyn kesý. Deı tursaq ta óz mindetimen birge elordanyń tártip saqshylary muqtaj adamdarǵa qolǵabys etip, kómegine jaraýǵa da ýaqyt taýyp júr. Ásirese jer úılerde turatyn jalǵyzbasty zeınetkerler úshin aıazdy kúnderi syrtqa shyǵyp, otyn nemese kómir kirgizýdiń ózi qıynǵa túseri anyq. Sol sebepti polıtsııa qyzmetkerleri eń aldymen osy sanattaǵy egde adamdarǵa kómektesýge tyrysady.
Tártip saqshylarynyń kómegin alǵan elordalyq 83 jastaǵy zeınetker Raıda Saberjanqyzy Mıftahova ózine kómek kórsetken polıtsııa qyzmekterlerine alǵysyn aıtty. Polıtsııa qyzmetkerleriniń ózderi bolsa muqtaj azamattarǵa shama-sharqynsha kómektesýge daıyn ekenin bildirip jatyr.
