Elorda polıtseıleri Táýelsizdik kúni qarsańynda balalardy kınologııa ortalyǵyna alyp bardy

NUR-SULTAN. QazAqparat – Elordanyń polıtsııa qyzmetkerleri karantın sharalaryn qatań saqtaı otyryp, «SOS balalar kentiniń» tárbıelenýshileri úshin Nur-Sultan qalasy Polıtsııa departamentiniń Kınologııalyq qyzmeti ortalyǵyna ekskýrsııa uıymdastyrdy.

Bul týraly QazAqparat Nur-Sultan qalasynyń Polıtsııa departamentine silteme jasap habarlaıdy.

Elordadaǵy Kınologııalyq qyzmet ortalyǵynyń bastyǵy Maksım Zýbov balalarǵa qyzmettik ıtterdi asyraý jaǵdaıy, ıtterdiń quqyq buzýshylardy ustaýǵa qalaı kómektesetini jaıynda baıandap berdi.

Sondaı-aq polıtseıler balalarǵa qyzmettik ıtterdi paıdalanýdyń taktıkalyq amaldary, olardy úıretýdiń erekshelikteri jáne ıt tuqymdary: nemis ovcharkasy, shyǵys-eýropalyq ovcharka, alabaı, rotveıler, tóbetterdiń erekshelikterine toqtalyp ótti. Balalarǵa ıtterdiń qandaı baǵyttar boıynsha bólinetini jaıynda baıandaldy. Bul – iz kesýshi ıtter, esirtki, jarylǵysh zattardy izdeıtin ıtter jáne kúzetshi ıtter.

Ekskýrsııada balalar qyzmettik ıttermen jaqynyraq tanysa aldy. Kınologtar qonaqtarǵa qyzmettik ıtterdiń buıryqty qalaı oryndaıtynyn, jasyrynǵan zattardy qalaı izdeıtinin kórsetti. Jaqynda qyzmettik ıtterdiń qataryna tóbetter qosylǵan. Mamandar bul ıtterdi esirtkini tabýǵa, adamdardy ıisimen izdeýge úıretip jatqan.

«Tóbetter jaqsy úıretiledi, olardyń ıiskeý, dybys estý, kórý músheleri jaqsy damyǵan. Olar óte tózimdi janýarlar, qoıylǵan maqsatty jaqsy oryndaıdy», - dedi M.Zýbov.

Búginde elordanyń kınologııalyq ortalyǵynda ıt tuqymdarynyń 38 túri bar.

Ekskýrsııa óte qyzyqty ótti. Balalar jańa dostaryna taǵy qonaqqa keletin boldy. Kezdesý sońynda balalarǵa syılyqtar tabystaldy.