Elorda polıtseıleri páter tonaýshylar tobyn quryqtady
ASTANA. 7 qazan. QazAqparat - Jumys kúni aıaqtalysymen elorda turǵyny «S» esimdi azamat úıge kelisimen onyń páterinde belgisiz bireýlerdiń bolǵandyǵyn ańǵaryp, altyn buıymdary men noýtbýgynyń joqtyǵyn kórgen jábirlenýshi dereý polıtsııaǵa habarlaıdy.
Birneshe kúnnen keıin Esil aýdany ІІB-na «D» esimdi azamat habarlasqan, onyń da úıine shaqyrylmaǵan qonaq kelip kıimderi men noýtbýgin áketken.
«Tártip saqshylary taldaý jumystaryn júrgize kele, bir-birine aınadaı aınymas qylmystardy bir ǵana adam jasaǵan dep sheshedi», - dep habarlady qalalyq ІІD baspasóz qyzmeti.
Jedel-izdestirý sharasy kezinde polıtseıler qalanyń jaldamaly páterleriniń birinen úsh belgisiz tulǵany ustaıdy. Bólmeni tekserý kezinde qylmyskerler óz múddelerine paıdalana almaǵan kıimder tabylady.
Ustalǵan adamdardyń túsiniktemesi boıynsha urlanǵan zattardyń jartysyn saýda úılerindegi tanymaıtyn adamdarǵa arzan baǵaǵa satqan.
Tutqynǵa alynǵandardyń jeke basyn anyqtaý kezinde saqshylar olardyń ekeýiniń Aqtóbe jáne Aqmola oblystarynda týǵandaryn, eki ret qylmystyq jaýapkershilikke tartylǵan tulǵalar ekenin anyqtaıdy. Al toptyń úshinshi bir múshesi 1990 jyly Soltústik Qazaqstan oblysynda týǵan, buryn sottalmaǵan adam eken. Astana qalasynda ýaqytsha turyp, esh jerde jumys istemegen.
Astanalyqtardyń jartysynan kóbi kúndizgi mezgilde jumysta bolady, osyny paıdalanǵan aram pıǵyldylar páterdi kúndiz tonaǵan. Ekeýi páterdiń tas talqanyn shyǵaryp jatqanda, úshinshisi úıdiń syrtynan kúzetken. Páterge tez, ári kedergisiz ený úshin olar «krest» qulpy bar úılerdi tańdaǵan, óıtkeni bul qulyptar lezde buzylýǵa jatady.
Qazirgi tańda ustalǵan tulǵalar Astana q. ІІD ÝQUI ornalastyryldy. Osy fakti boıynsha QR QK 175-baby boıynsha qylmystyq is qozǵaldy.
Qylmyskerlerdiń osyndaı mándegi ashylmaı jatqan qylmystarǵa qatystylyǵyn anyqtaý boıynsha tekseris jumystary júrgizilýde.
