Elorda polıtseıleri órtke oranǵan úıden 60 adamdy qutqardy
NUR-SULTAN. QazAqparat - Elordanyń polıtsııa qyzmetkerleri órt shyqqan kóppáterli turǵyn úıden 60-qa jýyq adamdy qaýipsiz jerge shyǵardy, dep habarlaıdy QazAqparat tilshisi.
«Búgin tańerteńgi saǵat 09-10-da Saryarqa dańǵylyn patrýldep júrgen Nur-Sultan qalalyq PD Patýrldik polıtsııa polkiniń aǵa leıtenanty Talǵat Namazbaev kóppáterli turǵyn úıdiń 7 qabatyndaǵy terezeniń birinen órt shyǵyp jatqanyn baıqaıdy. Polıtseı Jedel basqarý ortalyǵyna órt jaıynda birden habarlap, ózi tereze túbine kómek kólikteri kedergisiz kirýi úshin aýmaqty tazartý jumysyna kirisedi. Úsh mınýttyń ishinde órt ornyna aǵa leıtenat Nurbolat Muqamedııa men polıtsııa kapıtany Qýanysh Dekmanov jetedi. Olar jedel joǵary kóterilip, tútin basqan páterden turǵyndardy qaýipsiz jerge shyǵara bastaıdy», - dep atap ótedi Nur-Sultan qalalyq PD baspasóz qyzmetinen.
Vedomstvo málimetinshe, 37 jastaǵy kelinshek pen eń kishkentaı 1 jastaǵy, al úlkeni 14 jastaǵy 4 kámeletke tolmaǵan bala bolǵan. Polıtseıler olardy dalaǵa shyǵarǵannan keıin órt sóndirýshilerdiń kelýin kútpesten, úı turǵyndaryn qaýipsiz jerge ár páterdiń esigin qaǵyp, adamdardyń dalaǵa shyǵýyna kómektesken.
«Páterlerdiń birinde úıde jalǵyz qalǵan 6 jasar bala bolǵan. Polıtseıler balanyń ata-anasymen habarlasyp, olar kelgenshe esiktiń syrtynan onyń kóńil aýlaǵan. Taǵy bir páterde úıde jalǵyz qalǵan bala uıyqtap jatqan. Degenmen, ol esikti ózi asha alyp, polıtseıler balany dalaǵa alyp shyqty. Polıtsııa qyzmetkerleriniń shuǵyl ári utymdy áreketteriniń arqasynda qaıǵyly jaıt oryn alǵan joq jáne azamattardyń ómiri saqtaldy. Aıta keterligi, polıtsııa qyzmetkerlerine Aınabek esimdi qala turǵyny da kómektesip, adamdardy qaýipsiz jerge shyǵarýǵa qolǵabys tıgizdi», - dedi departamentten.
Buǵan deıin Nur-Sultanda kópqabatty úıden órt shyǵyp, 3 bala qutqarylǵanyn habarlaǵan edik.
