Elorda polıtseıleri kúsheıtilgen jumys rejımine kóshti

ASTANA. QazAqparat - Elordada memleketter men úkimetter basshylarynyń qatysýymen iri halyqaralyq is-sharalardy ótkizýge baılanysty Astana polıtseıleri búginnen bastap qyzmet atqarýdyń kúsheıtilgen nusqasyna kóshti, – dep habarlaıdy Polisia.kz.

10 qazan saǵat 21.00-den bastap statsıonarlyq baqylaý beketteriniń bazasynda elorda aýmaǵyna kirýdi baqylaý kúsheıtildi, beketterde qyzmet atqarýdy táýlik boıy quramynda polıtsııa qyzmetkerleri men QR Qorǵanys mınıstrliginiń áskerı qyzmetshileri bar mobıldi toptar júzege asyrady. Kóshi-qon zańnamasyn buzý áreketteriniń aldyn alý jáne jolyn kesý maqsatynda 1 qazannan bastap «Ýchaske» Respýblıkalyq jedel-aldyn alý is-sharasy ótkizilip jatyr.

Jol qaýipsizdigin qamtamasyz etýge jáne jol qozǵalysy erejelerin saqtaýǵa erekshe nazar aýdarylatyn bolady. Ótkiziletin is-sharalarǵa baılanysty qalanyń jańa ákimshilik ortalyǵynda joldardyń keıbir ýchaskelerinde qozǵalys ýaqytsha ishinara shekteledi.

Astana qalasynyń Polıtsııa departamenti elorda turǵyndary men qonaqtarynan ótkiziletin is-sharalarǵa túsinistikpen qaraýdy suraıdy jáne yńǵaıly bolý úshin qoǵamdyq kólikti paıdalanýdy usynady.

«Qaýipsizdik jáne kólik kidiristerin boldyrmaý úshin jol júrý marshrýttaryn aldyn ala josparlaýdy jáne jol qozǵalysy erejelerin qatań saqtaýdy usynamyz»,-delingen habarlamada.

Foto: t.me/POLICE_of_KZ