Elorda polıtseıleri kópirden sekirip ólmek bolǵan jigitti qutqaryp qaldy
NUR-SULTAN. QazAqparat – Nur-Sultan polıtseıleri kópirden sekirmek bolǵan er adamdy qutqaryp qaldy, dep habarlaıdy QazAqparat elordalyq polıtsııa departamentiniń baspasóz qyzmetine silteme jasap.
Keshe keshki 19:15 kezinde Nur-Sultan qalasynyń Jedel basqarý ortalyǵyna kólikke janarmaı quıý stansasynyń qasyndaǵy kópirden er adamnyń sekirýge árekettenip turǵany týraly habarlama kelip túsken.
Patrýldik polıtsııanyń eki ekıpajy oqıǵa ornyna úsh mınýtta kelip jetti.
Jas jigit kópir taıanyshyn ustap, temir jolǵa sekirýge daıyndalyp turdy. Jaǵdaıdy baǵalaǵan polıtseıler jigitpen alystan sóılesip, kóńilin basqaǵa aýdarmaq boldy.
Osy ýaqytta patrýldik polıtsııa qyzmetkeri Jandos Turashev ońtaıly sátti paıdalanyp, jigitke jaqynyraq kelip, ony qatty qapsyryp ustap aldy.
Jas jigit qarsylyq tanytyp, bastaǵan isin aıaqtamaq bolǵan. Polıtseılerdiń jedel ári retke keltirilgen is-áreketiniń arqasynda er adamnyń ómiri aman qaldy.
Elordanyń 26 jastaǵy turǵyny qalalyq aýrýhanaǵa jetkizildi, munda oǵan medıtsınalyq jáne psıhologııalyq kómek kórsetildi.
