Elorda polıtseıleri karantın rejıminiń saqtalýyn qatań baqylaýda
NUR-SULTAN. QazAqparat – Nur-Sultan qalasynyń polıtsııa qyzmetkerleri karantın rejıminiń saqtalýy boıynsha shara qabyldaý jumysyn jalǵastyrýda, dep habarlaıdy QazAqparat tilshisi qalalyq polıtsııa departamentiniń baspasóz qzymetine silteme jasap.
Quqyq qorǵaýshylar tártip saqtalmaǵan nysandarǵa, ásirese meıramhanalar, dámhanalar, karaoke, barlar men saýda ortalyqtaryna erekshe nazar aýdaryp otyr.
«Polıtsııa qyzmetkerleri kásipkerlik sýbektilerine kúndiz de, túnde de reıd júrgizip, karantın tártibin buzǵan azamattardy anyqtap, olardy jaýapkershilikke tartýda. Sonymen qatar demalys kúnderi quqyq qorǵaýshylar koronavırýs ınfektsııasynyń taralýyna jol bermeý úshin karantın rejıminiń saqtalýy kerektigi jóninde halyqqa túsindirý jumystaryn júrgizedi. Demalys kúnderi halyqtyń basym bóligi adamdar kóp jınalatyn oryndarǵa, baqtarǵa, bazarlarǵa baratyny belgili. Osyǵan oraı tártip saqshylary saqtyq sharalaryn ustanýǵa shaqyryp, sanıtarlyq normalar men áleýmettik qashyqtyqtyń saqtalýyn qadaǵalaıdy», - dep habarlaıdy polıtsııa departamentinen.
Sonymen qatar kóńil kóteretin oryndardyń ıelerine karantın sharalarynyń saqtalýy kerektigin eskertedi.
«Bir táýliktiń ishinde Nur-Sultan qalasynyń polıtsııa qyzmetkerleri qalalyq taýarlar men qyzmetterdiń sapasy jáne qaýipsizdigin qadaǵalaý basqarmasynyń mamandarymen birigip, kásipkerliktiń 141 nysanyn tekserdi. Tekserý barysynda karantın rejımin buzýdyń 70 jaǵdaıy tirkeldi. Zań buzýshylardyń bári de ákimshilik jaýapkershilikke tartylǵan.
Nur-Sultan qalasynyń polıtsııa departamenti karantın rejımin saqtaýǵa shaqyrady.
