Elorda polıtseıleri dári-dármekti qymbat baǵamen satqan birneshe nysandy anyqtady
NUR-SULTAN. QazAqparat - Krımınaldyq polıtsııa qyzmetkerleri Telegram messendjeri arqyly dári-dármek satatyn alypsatarlardy anyqtady, dep habarlaıdy QazAqparat tilshisi.
«Saryarqa aýdanynyń polıtseıleri elde tapshy dári-dármekterdi saýdalap kelgen qalanyń eki turǵynyn ustady. 41 jastaǵy áıelden «Kleksan 4000» preparaty, «Ksarelto Rıvaroksaban», «Geparın» jáne «Fraksıparın» tárkilegen. Tárkilengen dári-dármektiń jalpy somasy 150 myń teńgeden asqan», - delingen Nur-Sultan qalalyq Polıtsııa departamentiniń baspasóz habarlamasynda.
Sondaı-aq, ustalǵan 24 jastaǵy jigitten 160 myń teńgeniń dári-dármekteri tárkilendi.
«Onyń ishinen 10 jáne 12 ampýladan turatyn «Fraksıparın» jáne «Meropenem» preparattary tárkilendi. Kúni boıy bolǵan reıd kezinde polıtsııa qaladaǵy 8 dárihanada dári-dármekterdi qymbattatylǵan baǵamen satý erejelerin buzýshylardy anyqtady», - delingen habarlamada.
Dárihana qyzmetkerleri dári-dármekterdi QR Densaýlyq saqtaý mınıstriniń 2019 jylǵy 15 shildedegi «Bólshek saýdada jáne kóterme saýdada dári-dármektiń taýarlyq ataýynyń shekti baǵalaryn bekitý týraly» buıryǵyn buza otyryp satqan.
«Reıdter bastalǵannan beri kúzetshiler 100-den astam quqyq buzýshylyqty anyqtady. Olar boıynsha 117 adam ustaldy, onyń ishinde 68-den astam dárihanashy bolǵan, 430 dárihana tekserildi. Tárkilengen medıtsınalyq buıymdardyń jalpy somasy shamamen 20 mıllıon teńgeni qurady. Barlyq anyqtalǵan faktilerge qoldanystaǵy zańnamaǵa sáıkes quqyqtyq baǵa beriledi», - delingen habarlamada.
Eger dári-dármekterdi zańsyz satý faktileri týraly bilseńiz, Nur-Sultan polıtsııa bólimine myna telefondar arqyly habarlasyńyz: 8 (7172) 71-62-91, 71-63-35, whatsapp 8-747-620-57-93, nemese «102».
