Elorda polıtseıleri birinshi jartyjyldyqty qorytyndylap, aldaǵy kezeńde atqarar mindetterin pysyqtady
ASTANA. Shildeniń 22-si. QazAqparat /Marlan Jıembaı/ - Búgin elordanyń Іshki ister departamenti aǵymdaǵy jyldyń birinshi jartyjyldyǵyn qorytyndylap, aldaǵy kezeńde atqarar mindetterin pysyqtady. Alqaly jıynǵa QR Іshki ister vıtse-mınıstri Amantaı Áýbákirov arnaıy qatysty.
Keńes barysynda departament basshylyǵy elordadaǵy jedel jaǵdaıdy sıpattap ótti. Ótken jyldyń jartyjyldyǵynda ishki ister organdary 2143 qylmys tirkedi. Mınıstrlik ókiliniń aldynda baıandama jasaǵan departament basshylyǵy qazirgi tańda Astana aýmaǵynda aýyr jáne óte aýyr qylmystar sanynyń qysqaryp otyrǵandyǵyn basa aıtty.
Astana qalalyq ishki ister departamentiniń bastyǵy, general-maıor Marat Demeýovtiń aıtýynsha, oryn alǵan qylmystarǵa júrgizilgen saraptamalarǵa sáıkes jasalatyn árbir úshinshi aýyr qylmys basqa qaladan kelgenderdiń nemese taıaý shetelder azamattarynyń qoldarynan isteledi eken. Máselen, izi sýymaı ashylǵan 41 qaraqshylyq shabýyldyń 24-in basqa qaladan kelgen azamattar jasaǵan. Atalǵan ister boıynsha 38 adam tutqyndaldy. Sondaı-aq 26 kisi óltirý oqıǵasynyń da 15-ine basqa qaladan kelgen azamattar jaýapty boldy. Jalpy elordasy - Astana qalasynyń jedel ahýalyn turaqtandyrý maqsatynda quqyq qorǵaý qyzmetkerleri «Barys», «Páter», «Qaraqshylyq», «Mıgrant», «Qańǵybas», «Turmys» syndy jedel aldyn alý is-sharalaryn turaqty túrde ótkizip keledi.
Elordalyq saqshylar qala kóshelerinde jáne basqa da qoǵamdyq oryndarda qoǵamdyq qaýipsizdikti qorǵaý baǵytynda da júıeli sharalardy atqarý ústinde. Qoǵamdyq tártipti saqtaý úshin qala kóshelerine kúndelikti 1 myń polıtsııa qyzmetkerleri shyǵady. Avtomobıl jáne jaıaý patrýlder, sondaı-aq qozǵalmaly beketter men statsıonarlyq postylardyń sany arttyryldy.
Qazirgi tańda qalada Jedel basqarý ortalyǵynyń tehnıkalyq múmkindigi de keńinen paıdalanylyp otyr. Astana aýmaǵynda 323 beınebaqylaý kamerasy kúndiz-túni istep tur. Olardyń kómegimen 177 qylmystyń izi sýymaı ashylsa, 23 myńnan astam ákimshilik quqyq buzýshylyq anyqtaldy.
Sonymen qatar polıtsııa qyzmetkerleri kúshimen mıgratsııalyq baqylaý da kúsheıtildi. Elimizge kelý erejesin buzǵany úshin 6490 sheteldik azamat ákimshilik jaýapkershilikke tartylsa, onyń 534-i respýblıka aýmaǵynan tysqary shyǵaryldy. Al 47 jumys berýshi sheteldik jumys kúshin zańsyz tartqany úshin ákimshilik jaýapkershilikke tartyldy.
Astana qalalyq ishki ister departamenti qyzmetiniń óte mańyzdy baǵyttarynyń biri esirtkiniń zańsyz aınalymymen kúres jáne «Astana - esirtkisiz qala» óńirlik baǵdarlamasyn júzege asyrý bolyp tabylady. Bul baǵytta atqarylǵan jumystar da óte aýqymdy. Máselen, aǵymdaǵy jyldyń birinshi jartyjyldyǵynda esirtki zattarynyń zańsyz aınalymyna qatysty 137 qylmys áshkerelendi. Onyń 44-i esirtki zattaryn satý qylmysy. Osy qylmystar barysynda ártúrli esirtki zattarynyń 108 keli 850,75 gramy tárkilense, onyń 6 keli 913,065 gramy esirtkiniń eń aýyr túri - geroın. Arnaıy júrgizilgen is-sharalar barysynda 17 esirtki satý núktesi men 1 esirtki prıtony joıyldy.
Alqaly jıyn barysynda Іshki ister vıtse-mınıstri A.Áýbákirov elordanyń Almaty, Saryarqa, Esil aýdandarynyń ishki ister basqarmalarynyń jumystaryna da erekshe nazar aýdardy. Atalǵan vedomstvolardyń basshylarynyń baıandamalaryn muqııat tyńdaǵan ol qylmystardyń ashylý deńgeıi jáne basqa da jaıttarǵa qatysty birqatar saýaldar qoıyp, naqty jaýap aldy. Sondaı-aq ol ishki ister organdary qyzmetkerleri arasyndaǵy jemqorlyq qylmystarǵa qatysty faktilerge erekshe nazar aýdaryp, bul baǵyttaǵy jumystardy odan ári kúsheıtýge nusqaý berdi. Jıyndy qorytyndylaǵan QR ІІM ókili tolyqtaı alǵanda elordadaǵy jedel jaǵdaıdyń turaqty bolyp otyrǵandyǵyn atap ótti.
