Elorda polıtseıleri áıel men úsh balany janyp jatqan úıden alyp shyqty
NUR-SULTAN. QazAqparat – Elordalyq polıtseıler janyp jatqan úıden áıel men onyń 15, 9 jáne 13 jastaǵy úsh balasyn qutqardy, dep habarlaıdy QazAqparat Nur-Sultan qalasy polıtsııa departamentiniń baspasóz qyzmetine silteme jasap.
Búgin tańerteń saǵat 5.40-ta patrýldik polıtsııa polkiniń qyzmetkerleri torýyldaý barysynda Ózen kóshesindegi jeke sektordan tútin shyǵyp jatqanyn baıqaǵan.
Ol úıdiń shatyrynan shyǵyp jatqan. Patrýldik polıtsııa polkiniń ınspektorlary aǵa leıtenanttar Erlan Qataev pen Asan Baltabaev dereý baryp, esikti buzyp, ishke kirgen.
Órt peshten shyqqan. Tútin bólmelerge taralyp úlgergen eken. Qarańǵyda olar uıyqtap jatqan qyzdy taýyp alǵan, al kelesi bólmede eki er bala uıyqtap jatqan.
Polıtsııa balalardy oıatqan. Bólmeden shyqqan shýdy estip, anasy júgirip kelgen. Úıdiń órtenip jatqanynan ol beıhabar eken.
Polıtsııa qyzmetkerleri áıel men úsh balany kóshege shyǵaryp, qyzmettik kólikterine jaıǵastyrǵan. Al ózderi órtti óshirýge ketken. Tártip saqshylary óz kúshterimen, qolda bar quraldarmen órtti sóndirgen.
Keıin Erlan Kataev bolǵan oqıǵa týraly: «Barlyǵy óte jyldam bolyp ketti. Biz úshin eń bastysy - áıel men onyń balalaryn qutqarý. Eshkim zardap shekken joq»,- dedi.
Evakýatsııa aıaqtalǵannan keıin oqıǵa ornyna jedel qyzmetter keldi. Úılesimdi jáne kásibı is-árekettiń arqasynda polıtseıler áıel men onyń 15, 9 jáne 13 jasar úsh balasynyń ómirin saqtap qaldy.
Otaǵasy polıtsııa qyzmetkerlerine shyn júrekten alǵysyn jetkizdi.
