Elorda polıtseıleri «Alataý» sport kesheninen bomba izdedi
NUR-SULTAN. QazAqparat – Elordanyń polıtsııa qyzmetkerleri «Alataý» sport kesheni mańyna bomba qoıylǵany týraly habarlaǵan adamdy ustady. Bul týraly Nur-Sultan qalalyq Polıtsııa departamentinen málim etti, dep habarlaıdy QazAqparat tilshisi.
Belgisiz adam uıaly telefonmen «112» nómirine habarlasyp, «Alataý» sport kesheni mańyna bomba qoıylǵanyn aıtqan. Osydan keıin kınologtar men jarylystehnıkteri sport kesheniniń ǵımaratyn, sol mańaıdy tintip shyqqanymen, bomba tabylǵan joq.
«Jedel-izdestirý sharalary barysynda terrorızm aktisi týraly habarlaǵan 39 jastaǵy er adam ustaldy. Ol ishimdikke mas kúıde bolǵan. Tergeý barysynda kúdikti buǵan deıin birneshe ret urlyq, alaıaqtyq jáne esirtki zattaryn saqtaǵany úshin qylmystyq jaýapkershilikke tartylǵany anyqtaldy. Kúdikti ustalyp, Polıtsııa departamentiniń ýaqytsha oqshaýlaǵyshyna qamaldy. Atalǵan fakti boıynsha QR QK 273-babymen tergeý júrip jatyr», - dep atap ótedi vedomstvodan.
Osy rette elordalyq polıtsııa qala qonaqtary men turǵyndaryna terrorızm týraly jalǵan habarlandyrý qylmystyq jaýapkershilikke túrtki bolatyndyǵyn eskertip otyr.
Aıta keterligi, jyl basynan beri astanada terrorızm aktisi týraly 6 jalǵan habarlama tirkeldi. Polıtsııa qyzmetkerleri qylmysty jasaǵandardyń barlyǵyn ustady. Kóp jaǵdaıda mundaı jalǵan habardy kámeletke tolmaǵandar men mas adamdardyń jasaıtyndyǵy anyqtalǵan.
