Elorda polıtseıleri 4-qabattan sekirmek bolǵan 34 jastaǵy qala turǵynyn qutqardy
NUR-SULTAN. QazAqparat - Elorda polıtseıleri 4-qabattan sekirip ólmek bolǵan turǵyndy qutqardy, dep habarlaıdy QazAqparat qalalyq polıtsııa departamentiniń baspasóz qyzmetine silteme jasap.
Nur-Sultan qalasynyń 34 jastaǵy turǵyny mas kúıinde 4-qabattyń balkonynan sekirmek bolǵan.
«2 maýsym kúni Baıqońyr aýdandyq polıtsııa basqarmasynyń qyzmetkerleri Taha - Hýseın kóshesi boıyndaǵy ákimshilik aýmaqty aralaý kezinde er adamnyń 4-qabattyń balkonynan sekireıin dep jatqanyn estip, tez arada kómekke umtyldy. Sonymen qatar, osy oqıǵany kórgen kýágerlerdiń biri «102» qyzmetine de qońyraý shalǵan. Osy ýaqytta Taha-Hýseın mekenjaıyna jaqyn mańda patrýlde júrgen Talas-111 polıtsııa jasaǵynyń quramynda bolǵan Muhametqalı Qaldybekov pen Qaıat Pshembaı oqıǵa ornyna kelip, er adamdy qutqarýǵa kómektesti» delingen habarlamada.
Tártip saqshylary óz ómirine tóngen qaýipke qaramastan jedel jáne úılesimdi is-árekettiń arqasynda er adamdy qutqaryp, qaıǵyly oqıǵanyń aldyn aldy.
