Elorda polıtseıleri 24-qabattan sekirmek bolǵan er adamdy qutqardy

ASTANA. QazAqparat - Elorda polıtseıleri 24-qabattan sekirmek bolǵan er adamdy qutqaryp qaldy, dep habarlaıdy QazAqparat Polisia.kz-ke silteme jasap.

Polıtsııanyń «102» arnasyna tún ortasynda Saraıshyq kóshesinde kópqabatty úıdiń balkon qorshaýynda er adam otyrǵany jáne sekirýge tyrysyp jatqany týraly aqparat tústi. Oqıǵa ornyna polıtsııa qyzmetkerleri Erjan Aısa men Nursultan Egembaıdan turatyn Astana qalasy PD patrýldik polıtsııa polkiniń jasaǵy dereý jiberildi.

Oqıǵa ornyna kelgen polıtseıler balkon qorshaýynan eńkeıip, tómenge sekireıin dep otyrǵan adamdy kórgen. Jaǵdaıdy baqylap, ýaqytty joǵaltpaı, tártip saqshylary tez arada joǵary kóterildi. Olardy baıqaǵan er adam ózine jaqyndamaýdy eskertip, aıqaılaı bastaǵan.

Polıtseıler er adammen dıalog qurýǵa tyrysty jáne onyń aldanyp turǵan sátin paıdalanyp, oǵan tez júgirip baryp, ustap úlgerdi.

Sodan keıin olar er adamdy qaýipsiz jerge aparyp, stresstik jaǵdaıdy sheshýge kómektesip, tynyshtandyrǵan. Sekirmek bolǵan er adam Esil aýdanynyń Polıtsııa basqarmasyna jetkizildi. 28 jastaǵy azamattyń mundaı is-áreketke ne ıtermelegeni anyqtalyp jatyr. Psıhologtarmen birlesip onymen profılaktıkalyq jumystar júrgizildi.

Foto: polisia.kz