Elorda polıtseıleri 20 keli esirtki satpaq bolǵan adamdy ustady
NUR-SULTAN. QazAqparat – 16-20 qarasha aralyǵynda elorda aýmaǵynda «Dármeg» jedel-aldyn alý sharasynyń 3-kezeńi ótip jatyr. Bul týraly QazAqparat Nur-Sultan qalasy Polıtsııa departamentiniń baspasóz qyzmetine silteme jasap habarlaıdy.
Jedel-aldyn alý sharasynyń aıasynda elorda aýmaǵynda esirtkilik zattar men psıhıkalyq belsendi zattardy satýmen aınalysatyn tulǵalardyń qyzmeti anyqtalýda.
Osylaısha, is-sharany júrgizýdiń alǵashqy kúninde, aǵymdaǵy jyldyń 16 qarashasynda Jeńis kóshesinde esirtki saýdalaǵany úshin elordanyń buryn sottalǵan 39 jastaǵy turǵyny ustaldy. Jeke tekserý kezinde onyń sómkesinen nasha salynǵan 13 polıetılen paketi anyqtaldy. Al er adamnyń páterin tintý kezinde polıtseıler odan «nasha» salynǵan 3 polıetılen paketi men býyp-túıilip, saýdalaýǵa daıyndap qoıǵan esirtki túıinshegin anyqtady.
Arnaıy is-qımyldar nátıjesinde zańsyz aınalymnan 20 kelige jýyq esirtki alyndy. «Qara naryqta» bólshek saýdada onyń quny aqshalaı ekvıvalentte 30 mln-nan astam teńgeni quraıtyn edi.
Elorda aýmaǵynda esirtki jetkizýge jáne saýdalaýǵa qatysy bar qylmystyq tizbektiń basqa da qatysýshylaryn anyqtaý boıynsha izdeý sharalary ótkizilýde.
QR Qylmystyq kodeksiniń 296-babynyń 4-bólimi (Asa iri kólemde esirtki zattaryn zańsyz saqtaý), 297-baptyń 3-bólimi (Asa iri kólemde esirtki zattaryn satý) jáne 287-baptyń 2-bólimi (Qarý-jaraq pen oq-dárilerdi zańsyz satyp alý jáne saqtaý) boıynsha qylmystyq is qozǵaldy. Bul baptar 10 jyldan 25 jylǵa deıin bas bostandyǵynan aıyrý jazasyn qarastyrady.
Ustalǵan er adam Nur-Sultan qalasy Polıtsııa departamentiniń ýaqytsha oqshaýlaǵyshyna qamaldy. Tergeý amaldary júrgizilýde.
