Elorda polıtseıleri «102» mobıldi qosymshasy arqyly 1 myńnan astam ótinish qabyldady

NUR-SULTAN. QazAqparat – Aqpan aıynda iske qosylǵan «102» mobıldi qosymshasy arqyly polıtsııa operatorlary myńnan astam ótinishti qabyldady. Bul týraly elordalyq polıtsııa departamenti jedel basqarý ortalyǵy basqarmasynyń basshysy Qaırat Raýshanov aıtyp berdi, dep habarlaıdy QazAqparat.

«Memleket basshysynyń «halyq únine qulaq asatyn memleket» tujyrymdamasyn qurý tapsyrmasyn oryndaý aıasynda 2021 jyldyń 1 aqpanynan bastap elordalyq polıtsııa departamentiniń jedel basqarý ortalyǵynda «azamattardyń habarlamalaryn qabyldaý protsesiniń birizdiligi» jobasy jumys isteı bastady. Qala turǵyndary men qonaqtary «102» jedel polıtsııa shaqyrý kanalynan bólek, «POLICE102» mobıldi qosymshasy arqyly polıtsııaǵa habarlasa alady. Bul júıe azamatqa yńǵaıly kez kelgen tásilmen (qońyraý shalý, aýdıo, beıneqońyraý, mátindik messendjer arqyly) qylmys nemese quqyqbuzýshylyq týraly aqparatty jedel basqarý ortalyǵynyń operatoryna tikeleı habarlaýǵa múmkindik beredi», - dep atap ótti Qaırat Raýshanov.

Onyń aıtýynsha, atalǵan júıe operatorǵa abonenttiń geolokatsııasyn jáne onda bolyp jatqan barlyq oqıǵalardy tikeleı kórýge múmkindik beredi.

«POLICE102» mobıldi qosymshasyn ARP store jáne Play Market júıelerinen tegin júkteýge bolady.

Ol úshin azamattar jeke derekterin tirkep, olardy qoljetimdi tásildermen rastaýy qajet, sodan keıin JBO operatoryna beıne jáne aýdıojazbalardy, foto nemese beınematerıaldardy jáne mátindik formatta ótinishter men shaǵymdardy jibere alady.

Sondaı-aq, azamattar osy mobıldi qosymshanyń jáne ınternet-portaldyń kómegimen polıtsııa qyzmetiniń baǵyty boıynsha ózderin qyzyqtyrǵan kóptegen suraqtarǵa óz betinshe jaýap taba alady, bul jedel ortalyqtardyń operatorlaryna júktemeni azaıtady.

«Atalǵan sanattaǵy ótinishterdi dereý qabyldap, pysyqtaý úshin jedel basqarý ortalyǵynda jáne polıtsııa departamentiniń kezekshi bólimderinde qosymsha avtomattandyrylǵan jumys oryndary quryldy. Joba jumys isteı bastaǵannan beri polıtsııa operatorlary 1109 ótinishti qabyldady, onyń ishinde 132 beıne qońyraý jáne 977 mátindik habarlama bar. Búginde ishki ister organdary óz qyzmetinde zamanaýı tehnologııalardy barynsha paıdalanady, al azamattardyń múddelerin qorǵaý jáne qylmystar men quqyqbuzýshylyqtardyń sanyn azaıtý burynǵydaı basty nazarda»,- dep atap ótti Qaırat Raýshanov.