Elorda oqýshylarynyń jekelegen sanattary qoǵamdyq kólikterde jeńildikpen jol júre alady
ASTANA. QazAqparat - Astana oqýshylarynyń jekelegen sanattarynyń qoǵamdyq kólikterde jeńildikpen jol júrýi máselesi búgin qalalyq máslıhattyń kezekti sessııasynda qarastyryldy, dep habarlady qalalyq ákimdiktiń baspasóz qyzmetinen.
Astana qalasy ákiminiń orynbasary Andreı Lýkınniń tapsyrmasymen osy máselege baılanysty arnaıy jumys toby qurylǵan bolatyn. Jetim balalar men ata-analarynyń qamqorlyǵynsyz qalǵan balalar, áleýmettik kómek alýǵa quqyǵy bar otbasylardan shyqqan balalar, sondaı-aq, aı saıynǵy tabysy kúnkóris deńgeıinen tómen otbasylardan shyqqan balalarǵa qalalyq jolaýshylar kóliginde jeńildikpen júrý quqyǵy beriledi. Eske salaıyq, 56-shy kezekten tys sessııada qalalyq máslıhat depýtattary elordalyq bıýdjetke ózgerister engizgen bolatyn. Sessııa barysynda elordanyń 1-4 synyp oqýshylaryn tegin tamaqtandyrýmen qamtamasyz etý úshin 1 mlrd 93 mln teńge kóleminde qarajat bólindi.
