Elorda oqýshylary «SportFEST Kazakhstan» jobasynyń irikteý oıyndaryna qatysty
NUR-SULTAN. QazAqparat - Nur-Sultan qalasynda SportFEST Kazakhstan respýblıkalyq jobasynyń irikteý kezeńderi ótti, dep habarlaıdy QazAqparat.
Qalanyń 4 aýdanynan kelgen 132 oqýshy bozbalalar arasyndaǵy fýtzal, qyzdar arasyndaǵy basketbol, áskerı-qoldanbaly sport túrleri, shahmat, ústel tennısi men ulttyq oıyn - toǵyzqumalaq boıynsha baq synasty. Spartakıadanyń irikteý kezeńine astanalyq 24 komanda qatysty.
Qatysýshylardy quttyqtaýǵa «Samruk-Kazyna Trust» áleýmettik jobalardy damytý qorynyń ókilderi, oblystyń sport elıtasynyń ókilderi, jergilikti bilim berý bóliminiń basshylary keldi.
-«SportFEST» - biz úshin mańyzdy jobalardyń biri. Osy zalda elordanyń úzdik sportshylary jınaldy degen senimdemin. Búgin sizder maýsym aıynyń basynda «Baldáýren» respýblıkalyq oqý - saýyqtyrý ortalyǵynda fınal oıyndaryna qatysý úshin kúresesizder. Aıta ketý kerek, jarystan keıin irikteý týrlarynda qoldanylatyn barlyq sporttyq quraldar (tennıs ústelderi, doptar, ústel oıyndary) mektepterge syıǵa beriledi. Men barlyq qatysýshylarǵa sáttilik, pen jeńiske degen jiger tileımin!»,-dedi óziniń quttyqtaý sózinde «Samruk-kazyna trust» áleýmettik jobalardy damytý qory korporatıvtik kommýnıkatsııalar departamentiniń dırektory Mıras Іrgebaev.
Aıta ketken jón, «SportFEST Kazakhstan» jobasy bastalǵannan beri oǵan óńirlerde alty myńnan astam oqýshy qatysty. Elimizdiń birneshe oblysynda ótken shara aıasynda oqýshylar bir-birimen tanysyp, dostasyp jatyr. «SportFEST Kazakhstan» Aqtóbe, Qyzylorda, Shymkent, Pavlodar, Petropavl, Almaty, Taldyqorǵan, Oral, Qaraǵandy, Óskemen, Taraz, Túrkistan, Qostanaı jáne Aqtaý qalalarynda ótti. Bul óńirlerde úzdikter anyqtaldy.
Jeńimpazdar jáne júldeli oryn ıegerleri rolıkti konkılermen, brendtelgen rıýkzaktarmen jáne Power bank (mobıldi akkýmýlıator), skeıtbordtarmen marapattaldy. Birinshi oryn ıegerleri 2019 jyly Şýchınsk qalasynda ótetin fınalǵa joldama aldy. Aımaqtyq chempıondardyń tizimimen jobanyń resmı saıtynda tanysýǵa bolady - www.sportfest.kz.
Eske sala ketsek, «SportFEST Kazakhstan» - buqaralyq sport túrin nasıhattaý, jastardy salaýatty ómir saltyna shaqyrý men patrıottyq tárbıe berýge baǵyttalǵan biryńǵaı joba.
Al bul jastar jobasynyń uıymdastyrýshylary - «Samuryq-Qazyna» AQ kompanııalar tobynyń atynan «Samruk-Kazyna Trust» áleýmettik jobalardy damytý qory, sondaı-aq «Meniń elim» áleýmettik ınvestıtsııa baǵdarlamasymen birlesken «Kommýnıkatsııalyq bastama jáne strategııa qory».
