Elorda oqýshylary kúzgi kanıkýldy qalaı ótkizedi
NUR-SULTAN. QazAqparat – Nur-Sultan qalasy bilim basqarmasynyń basshysy Sholpan Qadyrova oqýshylardyń kúzgi kanıkýlynda qandaı sharalar ótetinin aıtyp berdi, dep habarlaıdy QazAqparat tilshisi.
«Taǵy bir mańyzdy taqyryp – oqýshylardyń búginnen bastap 15 qarashaǵa deıin sozylatyn kúzgi demalystaryn ótkizý. Kúzgi demalys «Qazaqstan balalary – kúzgi ınteraktıv» atty uranmen ótedi. Osy maqsatta ár mektepte is-sharalar jospary jasaqtaldy. Osy jospar boıynsha quqyq qorǵaý uıymdarynyń keńesteri, Qazaqstannyń JOO men kolledjderine vırtýaldy saıahattar, chellendjder, tanymal sportshylarmen kezdesý, 3D modeldeý jáne robot qurastyrý boıynsha sheberlik synyptary, qoldan jasalǵan buıymdar men sýretter kórmeleri ótkiziledi», - dep atap ótti basqarma basshysy qala ákimdiginde ótken brıfıngte .
Karantınniń qatańdaýyna baılanysty barlyq sharalar onlaın formatta ótkiziledi.
«20 qazan men 20 qarasha aralyǵynda kúzgi demalys kezinde bilim berý uıymdarynda «Bala quqyǵy – adam quqyǵy» aılyǵy ótedi. Іs-sharalar birinshi kezekte oqýshylardy quqyqtyq aqparattandyrýǵa, shyǵarmashylyq jáne zııatkerlik damytýǵa, otbasylyq qundylyqtardy nyǵaıtýǵa, ómirlik qıyn jaǵdaıǵa tap bolǵan balalar men otbasylar úshin qaıyrymdylyq sharalar uıymdastyrýǵa baǵyttalǵan. Al 1 qarashada «Durys tamaqtaný mektebi» jobasy aıasynda qala mektepteriniń oqýshylary arasynda chellendj iske qosyldy. Onyń negizgi maqsaty – durys tamaqtanýdy nasıhattaý. Bul jas urpaqty salaýatty jáne myqty bolyp ósýge kómektesetin jaqsy ádetter men daǵdylardy qalyptastyrýǵa kómektesedi», - deıdi Sh. Qadyrova.
Áleýmettik jelilerde «Bes asyl is» qaıyrymdylyq chellendji bastaldy. Sharanyń negizi maqsaty – balalardyń jaqsylyq jasaýǵa umtylysyn oıatý.
«Sonymen birge, kúzgi demalysta qosymsha bilim berý uıymdary óz jumysyn 10 oqýshydan aspaıtyn kezekshi toptarda aldyn-ala jazylý boıynsha shtattyq rejımde saǵat 9-dan keshki 18:00-ge deıin, onlaın rejımde – belgilengen kestege sáıkes jalǵasyratynyn aıtqym keledi. Al jalpy bilim berý ortalyqtarynda ornalasqan qosymsha bilim berý uıymdarynyń fılıaldary men kommıýnıtı-ortalyqtardyń jumysy karantındik sharalardyń qatańdaýyna baılanysty toqtatyldy», - dep túsindirdi Sholpan Qadyrova.
Buǵan deıin spıker oqý jylynyń birinshi toqsanyn qorytyndylap, kezekshi synyptarda 40 myńnan astam oqýshy bilim alǵanyn aıtyp berdi.
