Elorda oqýshylary qandaı lagerlerde jazǵy demalysyn ótkize alady
NUR-SULTAN. QazAqparat – Elorda oqýshylary Aqmola oblysy aýmaǵynda ornalasqan 2 lagerde jazǵy demalysyn ótkize alady. Bul týraly Nur-Sultan qalasy Bilim berý basqarmasy basshysynyń orynbasary Rımma Imangazınova aıtty.
«Jazǵy kezeńde balalardyń saýyqtyrý demalysyn, bos ýaqytyn jáne jumyspen qamtylýyn uıymdastyrý memlekettiń áleýmettik saıasatynyń ajyramas bóligi ári balalardyń shyǵarmashylyq damýy úshin múmkindik sanalady. Demalys - ol oqý sabaqtarynan bos ýaqyt, balaǵa erekshe nazar aýdaratyn, ony álemettik jaǵynan qorǵaıtyn aımaq. Ózderińiz biletindeı, elordada karantındik sharalar saqtalýda. Osyǵan baılanysty biz ata-analardyń balalar densaýlyǵyna alańdaıtyndyǵyn túsinemiz. QR Bilim jáne ǵylym mınıstrligi kelesi qala syrtyndaǵy lagerlerdiń jumysy arqyly balalar úshin jazǵy demalysty bıyl «Qazaqstan balalary jazdy qýanyshpen qarsy alady» atty uranmen uıymdastyrady: 240 oryndyq «Arman» týrıstik saýyqtyrý kesheni, 160 oryndyq «Býrovıchok» saýyqtyrý lageri», - dedi basqarma basshysynyń orynbasary.
Onyń atap ótýinshe, atalǵan lagerler qaladan 100 shaqyrym jerde, Aqmola oblysynda ornalasqan. Olarda balalardyń jazǵy lagerlerin barlyq sanıtarlyq normalardy saqtaı otyryp, 10 kúnge 5 aýysymda 7 maýsymnan 10 tamyzǵa deıin uıymdastyrý josparlanǵan.
«Qyzyl» aımaqta bolǵan kezde lagerlerdiń tolymdylyǵy 30 paıyzdy quraıdy. «Sary» aımaqta - 50 paıyzǵa deıin, «jasyl» aımaq - shekteýsiz. Búginde sanıtarlyq baqylaý basqarmasy men Aqmola oblystyq tótenshe jaǵdaılar departamentinen ruqsat qujatyn alý jumysy júrgizilip jatyr. Onyń ishinde aǵash qurylymdardy ottan qorǵaý boıaýymen óńdeý, elektr, órt dabylyna kelisimsharttar jasasý jáne basqa da jumys jasalyp jatyr. Shtattyq qyzmetkerler quryldy», - dedi Rımma Imangazınova.
Sondaı-aq, onyń dereginshe, elordada Ál-Farabı, Mahambet Ótemisuly atyndaǵy oqýshylar saraılarynyń bazasynda balalardyń jazǵy demalysyn uıymdastyrý josparlanyp otyr.
