Elorda oqýshylary avtobýsta tegin júretin kólik kartasyn qalaı alady
NUR-SULTAN. QazAqparat – City Transportation Systems (burynǵy - «Astana LRT») kompanııasy oqýshylardyń avtobýsta tegin júrýine arnalǵan kólik kartasyn alýdyń eki jolyn usynyp otyr, dep habarlaıdy QazAqparat tilshisi.
Aıta ketsek osydan bir apta buryn kompanııasy basshysy Bekmyrza Igenberdınov 28 naýryzdan bastap Nur-Sultan qalasynda kámeletke tolmaǵan balalar qalaishilik qoǵamdyq kólikpen tegin júretinin málim etken edi . Sol kezde kompanııa tarapynan bul rette oqýshylarǵa qazirgi kólik kartasyn aýystyrýdyń qajettigi joǵy aıtylǵan. Dese de kólik kartasy joq nemese ony joǵaltqan oqýshylar úshin CTS eki amal usynyp otyr.
«7 naýryzdan bastap balalardyń ataýly kólik kartasyn www.transcard.kz saıtynda onlaın tapsyrys berýge bolady. Ol úshin 7 jastan 15 jasqa deıingi balalardyń týý týraly kýáligi, oqý ornynan anyqtama, 3h4 sýreti kerek. Al 16 jastan 18 jasqa deıingi balalar jeke kýáligin, oqý ornynan anyqtamasyn, 3h4 sýretin jiberýi tıis. Saıtta kólik kartasyn shyǵarý úshin tólem jasaı alasyz. Baǵasy 400 teńge. 5 jumys kúnniń ishinde elektrondy poshtańyzǵa kartanyń daıyndyǵy týraly habarlama keledi. Sondaı-aq, kólik kartasyn alýdyń ekinshi amaly – kompanııanyń kassalary. Ol jerde sanaýly mınýttyń ishinde kartany alýǵa múmkindik bar», - dep habarlaıdy CTS kompanııasynan.
Balanyń ataýly kólik kartasyn ata-anasy elordadaǵy Qoshqarbaev kóshesi, 50/1 meken-jaıynda ornalasqan ortalyq kassadan ala alady. Qajetti qujattar: ata-anasynyń jeke kýáligi jáne ataýly kólik kartasy. Jeke kýálik alǵan jasóspirimder ózderi alady.
