Elorda murajaılarynda Ashyq esik kúni ótýde
ASTANA. 18 mamyr. QazAqparat - Jyl saıyn 18 mamyrda álemniń murajaı qyzmetkerleri ózderiniń kásibı merekeleri - Halyqaralyq murajaı kúnin atap ótedi. Bul mereke tuńǵysh ret 1977 jyly halyqaralyq murajaılar keńesinde (International Council of Museums, ICOM) mádenı mereke retinde bekitilgen bolatyn. 1978 jyldan bastap halyqaralyq murajaı kúni álemniń 150-den astam elinde atap ótile bastady.
Bıylǵy jyly Halyqaralyq murajaı kúni «Ashylý» uranymen uıymdastyrylýda. Bul isten Astana murajaılary da tys qala almady. Búgin elordadaǵy Qazirgi zaman óneri murajaıynda burynǵy jıyntyqtardan alynyp, biregeı «Neformat» kórmesi ótkizilýde. Onda Qazaqstan, Reseı, Ýkraına sýretshileriniń 1950 men 1977 jyldar aralyǵynda salynǵan kórkem, tarıhı qundylyqtaryn bildiretin 17 óner týyndysy qoıylǵan. Kirý barlyq kelýshilerge tegin, dep habarlady Astana qalasynyń resmı saıty.
Búgin, sondaı-aq, «Nazarbaev ortalyǵy» MM-de Halyqaralyq murajaı kúni qurmetine Ashyq esik kúni ótýde. Іs-sharalar aıasynda murajaıdyń kez kelgen bólimine bas suǵyp, «Murajaı: ǵasyrlar tiregi» kitap kórmesimen tanysýǵa bolady. Sonymen qatar, halyq ult aspaptar ansambliniń oryndaýynda halyq ánderi oryndalatyn kontsert uıymdastyrylady.
Saltanatty is-sharaǵa belgili saıasatkerler men qoǵam qaıratkerleri, Astana qalasynyń turǵyndary men qonaqtary, basqa da adamdar shaqyrylǵan.
