Elorda muǵalimderine qandaı eńbek jaǵdaılary jasalǵan
«Ustaz mártebesi týraly QR Zańynyń qabyldanýymen pedagogterdiń eńbekaqysy jyl saıyn kóterile bastady. Muǵalimder atalmysh zańnamalyq qujatty óz kásibin qurmetteý men tanýdyń belgisi dep sanaıdy. Máselen, elordalyq muǵalimderdiń jalaqysy sońǵy eki jylda - 2020/2021 jyldary 50%-ǵa ósti. 2022 jyly pedagogterdiń jalaqysy taǵy 25%-ǵa artady.
2021 jyldyń birinshi jartysynda Nur-Sultannyń 2384 muǵalimi biliktiligin arttyrý kýrstarynan tegin ótti.
Zamanaýı álemniń jańa syn-qaterleri ınnovatsııalyq pedagogıkalyq tehnologııalardy paıdalaný, oqýshylardyń synı oılaýyn damytý, shyǵarmashylyq daǵdylaryn ashý maqsatynda jańa oqý baǵdarlamalarynda shyǵarmashylyq ıdeıalardy qoldaný qabiletin talap etedi.
Buǵan elordalyq oqýshylardyń RІЅA halyqaralyq emtıhanyndaǵy jetistikteri, sondaı-aq PIRLS halyqaralyq zertteýine qatysýy mysal bola alady, onda álemdik bilim berý standarttary boıynsha fýnktsıonaldyq, oqyrmandyq, matematıkalyq jáne jaratylystaný-ǵylymı baǵyttar júıeli deńgeıde baǵalanady.
Elorda pedagogteriniń aldynda bilim berýdiń álemdik standarttaryna sáıkes oqytý tásilderin qaıta qaraý, sondaı-aq bar baǵdarlamalardy jetildirýde úlken mindet tur.
Osyǵan baılanysty Nur-Sultanda «SHARE» halyqaralyq jobasy iske asyrylýda, onyń maqsaty pedagogterdiń zertteý qyzmeti nátıjesinde anyqtalǵan menedjment pen oqytýǵa ózgeristerdi engizý arqyly bilim berý sapasyn arttyrý bolyp sanalady.
2019 jyldyń 1 qyrkúıeginen bastap jobaǵa qalanyń 5 mektebi qatysady: №37, 58, 59, 67, 76.
Jobany iske asyrý barysynda Kembrıdj ýnıversıtetiniń bilim berý fakýltetiniń basshylyǵymen birlesken jumys júrgizilýde. Elordanyń 5 mektebinen 25 muǵalim Kembrıdjdik áriptesterinen bilim aldy.
Bilim berý júıesiniń sapaly kadrlaryn daıarlaý maqsatynda JOO-larda pedagogıkalyq mamandyqtarǵa bólinetin granttar sany ulǵaıýda. Mysaly, bıyl Astana Halyqaralyq ýnıversıtetine túsý úshin talapkerlerden qujattar qabyldanyp, onda pedagogıkalyq mamandyqtar boıynsha 515 grant ornalastyryldy.
Attestattaý qorytyndysy boıynsha muǵalimderge pedagogıkalyq sheberligi úshin 30%-dan 50%-ǵa deıin, bilim berý uıymdarynyń basshylary men basshy orynbasarlary úshin laýazymdyq jalaqysynyń 30%-dan 100%-ǵa deıin qosymsha aqy tóleý kózdelgen.
Pedagogterdiń óz salalaryndaǵy jetistikteri jeke kótermelenedi.
Jaıly turǵyn úı jaǵdaılary da jasalýda.
2019 jyly «Týǵan jer» baǵdarlamasy aıasynda jas muǵalimderge arnalǵan 350 oryndyq jataqhana salyndy. Oryn elordalyq bilim berýdi damytýǵa úles qosý úshin Qazaqstannyń basqa óńirlerinen kelgen pedagogterge beriledi. Sonymen qatar, muǵalimderge turǵyn úı satyp alýǵa bastapqy jarna tóleý úshin turǵyn úı sertıfıkattary beriledi.
Aıta ketý kerek, bıylǵy oqý jylynda respýblıkalyq «Úzdik pedagog» baıqaýynda elordanyń 5 muǵalimi jeńimpaz atandy.
«Búgingi tańda muǵalimderimiz elimizdiń bilim berý protsesine ǵana emes, sonymen qatar álemdik bilim berý keńistigine ıntegratsııalaýǵa baǵyttalǵan», - dep atap ótti elordalyq bilim basqarmasynan.