Elorda meıramhanalary shekteý sharalaryn elemeı jatyr - Polıtsııa departamenti
NUR-SULTAN. QazAqparat – Elorda meıramhanalarynda otbasylyq is-sharalar ótkizý toqtamaı tur. Nur-Sultan qalasy Polıtsııa departamenti Jergilikti polıtsııa qyzmeti basqarmasynyń bólim bastyǵy Azamat Sadyqov málim etti, dep habarlaıdy QazAqparat tilshisi.
«Qabyldanyp jatqan sharalarǵa qaramastan, keıbir oıyn-saýyq mekemeleri men qoǵamdyq tamaqtaný nysandary sanıtarlyq-epıdemıologııalyq talaptardy buzyp, azamattardyń densaýlyǵyna qaýip tóndirýde. Osylaısha, 4 qarashada mobıldi toppen Jekebatyr kóshesindegi «Tekkıla» bary anyqtalǵan. Atalǵan dámhana jumys jáne demalys kúnderi saǵat 09:00-den bastap 22:00-ge deıin bekitilgen kesteni saqtamaı, qyzmet kórsetken. Sondaı-aq meıramhanalarda kóptegen qonaq shaqyryp, otbasylyq is-sharalar ótkizý úderisi baıqalady. Mysaly, 25 qazanda Sembınov kóshesinde ornalasqan «Sunqar» meıramhanasynda 50-den astam qonaq bolǵan, shildehana (qalja) atalyp ótken», - dedi A. Sadyqov onlaın rejımde ótken koronavırýs ınfektsııasynyń aldyn alý sharalary boıynsha baspasóz máslıhatynda.
Onyń sózine qaraǵanda, qalada karantın rejımin buzýdyń eki myńnan astam faktisi anyqtalǵan.
«Anyqtalǵan shekteý sharalaryn buzýǵa qatysty materıaldar Nur-Sultan qalasy Taýarlar men qyzmetterdiń sapasy men qaýipsizdigin baqylaý departamentine joldandy. Biz azamattarmen koronavırýs ınfektsııasynyń taralýyna jol bermeý boıynsha karantın rejımin saqtaý týraly túsindirý jumystaryn júrgizýdi jalǵastyrýdamyz. Qoǵamdyq jerlerde, saıabaqtar, bazarlarda saqtaný kerek ekenin eske salamyz jáne azamattardy sanıtarlyq normalar men áleýmettik qashyqtyqty mindetti túrde saqtaýǵa shaqyramyz», - dedi ol.
