Elorda men TMD elderi polıtseıleriniń birlesken is-qımyly: astanada 18 qylmysker ustaldy

ASTANA. QazAqparat – Elordalyq polıtsııa qyzmetkerleri Táýelsiz Memleketter Dostastyǵy elderimen birlesip, «Іzdestirý» keń aýqymdy operatsııasyn ótkizdi. Onyń barysynda qala aýmaǵynan 18 qylmysker ustaldy, dep habarlaıdy QazAqparat Astana polıtsııa departamentiniń baspasóz qyzmetine silteme jasap.

Baspasóz qyzmetinen málim etkendeı, jedel izdestirý sharalaryn júrgizý barysynda Tomsk oblysy boıynsha Reseı ІІMB tarapynan memleketaralyq izdeýde júrgen 42 jastaǵy qylmysker ustaldy. Ázerbaıjan Respýblıkasynyń azamaty Reseı Federatsııasynyń Qylmystyq kodeksiniń 105-babynda qarastyrylǵan (kisi óltirý) qylmysty jasaǵany úshin izdeýde bolǵan. Túngi ýaqytta kúdikti Tomsk qalasynda kafeniń janynda bolǵan janjal kezinde er adamǵa pyshaq jaraqatyn salǵan.

Sondaı-aq, Aqmola oblysynda elordalyq polıtseıler QR QK 296-babynyń 4-bóliginde kózdelgen qylmysty jasady dep aıyptalǵan, sol úshin halyqaralyq izdeýde júrgen Qazaqstan Respýblıkasynyń 66 jastaǵy azamatyn ustady. Odan erekshe ıisi bar qara sur tústi zat tabylyp, tárkilendi. Saraptama qorytyndysyna sáıkes, bul – jalpy salmaǵy 5,32 gramm gashısh esirtki zaty jáne jalpy salmaǵy 1 keli 280 gramm marıhýana bolyp shyqty.

Sondaı-aq, respýblıkadan tys jerlerde jedel aldyn alý is-sharasy aıasynda 2 qylmysker anyqtalyp, ustaldy. Al, is-tússiz joǵalǵan 6 azamattyń ornalasqan jeri belgili boldy.