Elorda men Ertis-Baıan óńiri arasynda ushaq baılanysy qaıta jandanady

PAVLODAR. KAZINFORM - 29 qazannan bastap Pavlodar men Astana qalalary arasynda jolaýshylar ushaǵy qatynaı bastaıdy dep kútilip otyr. Bir aralyqqa bılet quny - 15 myń teńge.

Pavlodarlyqtar 29 qazannan bastap elordaǵa ushaqpen qatynaı alady. Reısterdi Scat áýe kompanııasy moınyna alyp otyr.

- Elordaǵa áýe kemesimen qatynaý bir jolaýshy úshin 15 myń teńgeni quraıdy. Scat áýe kompanııasynyń ushaqtary aptasyna úsh ret: seısenbi, beısenbi jáne senbi kúnderi ushady. Atap aıtqanda tańerteń saǵat 9.25-te Astanadan ushyp shyqsa, saǵat 11.25-te Pavlodardan keri ushady. Bıletter qazirdiń ózinde satylymǵa shyǵaryldy,-dep habarlady óńirlik jolaýshylar kóligi jáne avtomobıl joldary basqarmasynan.

Qazirgi ýaqytta Pavlodardan ushaqtar tek Almaty qalasyna ǵana qatynaıdy. 

Eske sala keteıik, buǵan deıin Pavlodar áýejaıy uzaq ýaqytqa jabylýy múmkin ekeni týraly jazǵanbyz. Jospar boıynsha, áýejaıdyń jolaýshylardy ótkizý múmkindigin keńeıtý úshin áýejaı ǵımaratyn jáne ushaq qonatyn jolaǵyn tolyqtaı jańartý kózdelgen. Deıturǵanmen negizgi jóndeý jumystary kelesi jylǵa shegerildi.

Buǵan qosa, bıyl jazda Pavlodar áýejaıy ǵımarattaǵy oryndardy jalǵa berý qunyn zańsyz ósirgeni úshin qomaqty aıyppul arqalady.

Al onyń aldynda Pavlodar áýejaıy bıýdjettiń 142 mln teńgesin negizsiz jumsaýǵa talpynǵan.