Elorda men Almatyda 11 iri nysanǵa «mına qoıǵan» turǵyn sottaldy
NUR-SULTAN. QazAqparat – Áýe jáne temir jol kóligi nysandarynda terrorızm aktisi týraly 20-dan astam kórineý jalǵan habarlama tirkeldi, dep habarlaıdy QazAqparat tilshisi.
QR ІІM Kóliktegi polıtsııa departamentiniń baspasóz qyzmetinen málim etkenindeı, bıyl QR Qylmystyq kodeksiniń 273-baby, ıaǵnı terrorızm aktisi týraly kórineý jalǵan habarlaý boıynsha 22 qylmystyq quqyq buzýshylyq tirkeldi.
Departamenttiń ekstremızmge qarsy is-qımyl basqarmasynyń bastyǵy Erlan Álimovtiń aıtýynsha, bulardyń basym kópshiligi boıynsha sotqa deıingi tergep-tekserý amaldary júrgizilip jatyr.
E. Álimov bıylǵy shilde aıynda Nur-Sultan qalasy Esil aýdany №2 sotynyń sheshimimen Qostanaı oblysynyń 36 jastaǵy turǵyny QR QK 273-babynda kózdelgen qylmystyq quqyq buzýshylyq jasaǵany úshin kináli dep tanylyp, oǵan 1 jyl 6 aı merzimge bas bostandyǵynan aıyrý jazasy taǵaıyndalǵanyn jetkizdi.
Atalǵan er adam sáýir aıynda óziniń IT salasyndaǵy bilimin paıdalana otyryp, Nur-Sultan men Almaty qalalaryndaǵy 11 iri nysanǵa «mına qoıylǵany» týraly habarlama taratqan.
«Sonymen qatar, ekstremızmge qarsy is-qımyl basqarmasynyń qyzmetkerleri destrýktıvti dinı aǵymdardy ustanýshylar jasaǵan 27 ákimshilik quqyq buzýshylyqty anyqtady. Buǵan qosa, temirjol uıymdary qyzmetkerleriniń áleýmettik jelilerindegi jeke paraqshalarynda dinı materıaldardy saqtaýdyń 5 deregi belgili boldy», - dedi E. Álimov.
«Barlyq quqyq buzýshylyqtar boıynsha QR ÁQBK 490, 453-baptarymen ákimshilik jaýapkershilik sharalary qoldanyldy jáne sot árqaısysyna ákimshilik aıyppul saldy», - dep túıindedi sózin polıtsııa polkovnıgi.
Eske sala keteıik, terrorızm aktisi týraly kórineý jalǵan habarlama taratqany úshin QR Qylmystyq kodeksinde 5 myń AEK mólsherinde aıyppul salý, ne sol mólsherde túzeý jumystaryna jiberý, ne bes jylǵa deıingi merzimde bas bostandyǵyn shekteý ne sol merzimge bas bostandyǵynan aıyrý jazasy kózdelgen.
