Elorda - memleket damýynyń lokomotıvi
ASTANA. 6 maýsym. QazAqparat - Qazaqstan Respýblıkasy Prezıdentiniń janyndaǵy Memlekettik basqarý akademııasynyń tyńdaýshylary dáris alýmen qatar elordamyzdyń kórikti mádenı-tarıhı oryndaryn aralap kórdi.
Elimizdiń ár óńirinen jınalǵan azamattar áýeli Asharshylyq qurbandaryna ornatylǵan eskerkishke baryp, 1931-1932 jyldary qoldan jasalǵan alapat ashtyqtan kóz jumǵandardyń rýhyna taǵzym etti.
Odan soń akademııa tyńdaýshylary Qazaqstan Respýblıkasy Tuńǵysh Prezıdentiniń murajaıynda, «Báıterek» kesheninde boldy. Elordanyń bas qaqpasy - «El saltanaty» jáne «Qazaq Eli» monýmentin tamashalady. Bul mádenı is-shara Esil ózeninde qaıyqpen serýendeýmen aıaqtaldy.
Almaty qalasy Medeý aýdany ákiminiń orynbasary Nurlan Narjanov memlekettik qyzmette júrgen kezde osyndaı uıymdastyrylyp jatqan rýhanı-mádenı sharalardyń tájirıbe almasý úshin bereri mol ekenin aıtty.
«Oqýdan bólek, Astana qalasy ákmshiligi qyzmetkerleriniń uıymdastyrýymen ekskýrtsııalyq sharalar ótti. Eldiń aýzynda júrgen arý qalamyz - Astananyń záýlim ǵımarattaryn, mádenı ortalyqtaryn aralap, keremet áser aldym. Teledıdardan kórip, radıodan estip júrgenimiz bir bólek, kózben kórip, tanysýymyz tipten bólek. Qazaqstan Respýblıkasy Tuńǵysh Prezıdentiniń murajaıynda buryn bolǵan joq edim. Elbasynyń jumys ornyn kórip, memleketimizdiń jańa Elordasynyń alǵashqy jyldaryn, elimizdiń jańa myńjyldyqqa qadam basqan kezdegi atqarylǵan istermen jan-jaqty tanystym. Elbasymyzdyń josparly, júıeli eńbeginiń arqasynda búgingi tańda osyndaı nátıjelerge jetip otyrmyz. Astanadan alǵan áserimiz kóp. Elordamyzda jasalyp jatqan ıgi isterdi qolymyzdan kelgenshe ózimizdiń jumys ornymyzda, júrgen ortamyzda júzege asyrsaq, el seniminen shyqqanymyz bolyp esepteleri sózsiz. Elimizdiń barlyq óńiri Astanaǵa qarap úlgi alady»,- dedi Nurlan Narjanov.
«Elorda memleket damýynyń lokomotıvi ekenine kózimiz jetti»,- deıdi ár óńirden kelgen azamattar.
