Elorda mektepterinde as máziri jańardy: oqýshylarǵa ulttyq taǵam beriledi
ASTANA. KAZINFORM – Astana qalasynyń memlekettik jalpy bilim beretin uıymdarynda 1 sáýirden bastap as máziri jańartyldy. Bul bastama mektep oqýshylarynyń densaýlyǵyn nyǵaıtýǵa jáne durys tamaqtaný mádenıetin qalyptastyrýǵa baǵyttalǵan mańyzdy qadam bolyp otyr, dep habarlaıdy elorda ákimdiginiń resmı saıty.
Jańa mázirdi QR Oqý-aǵartý mınıstrligi men Densaýlyq saqtaý mınıstrligi birigip ázirlegen mekteptegi tamaqtanýdyń jańa standartynyń kúshine enýine baılanysty júzege asyryldy.
Atalǵan standart balalardyń jas erekshelikterin, fızıologııalyq qajettilikterin jáne zamanaýı taǵamtaný talaptaryn eskere otyryp ázirlendi. Sondaı-aq qazaq taǵamtaný akademııasynyń sarapshylary qatysyp, ǵylymı negizdelgen usynystar engizdi.
Jańartylǵan as máziriniń basty ereksheligi – onyń teńgerimdiligi men paıdaly quramynyń artýy. Ratsıonda et, balyq, qus eti, sút ónimderi, sondaı-aq jańa pisken kókónister men jemisterdiń úlesi kóbeıtilgen. Bul balalardyń aǵzasyn qajetti aqýyzdarmen, dárýmendermen jáne mıkroelementtermen qamtamasyz etýge múmkindik beredi.
Sonymen qatar densaýlyqqa zııan keltirýi múmkin ónimder mázirden alynyp tastaldy. Atap aıtqanda, tuz, qant jáne qanyqqan maılar mólsheri joǵary taǵamdar, shujyq ónimderi, fastfýd (pıtstsa, hot-dogtar), quramynda qosylǵan qanty bar shyryndar, spredter jáne konservanttary bar ónimder endi usynylmaıdy.
Jańa mázirde as quramynda etten, balyqtan nemese qus etinen daıyndalǵan ystyq taǵamdar bar. Sonymen birge tutas dándi daqyldar, kókónister, jemister men sút ónimderin keńinen paıdalaný kózdelgen.
Astana mektepterinde sondaı-aq mektep tamaqtanýyna ulttyq komponent engizý bastamasy iske asyrylýda. Bul «Ulttyq mektep ashanasy» jobasy aıasynda júzege asyp, oqýshylardy dástúrli taǵamdarmen tanystyrýǵa múmkindik beredi. ıAǵnı, aptanyń bir kúninde oqýshylarǵa qazaqtyń ulttyq taǵamy – asylǵan et te beriledi.
Jańartylǵan mázirdiń saqtalýyn baqylaý birneshe deńgeıde júrgiziledi. Bul mindet mektep ákimshilikterine júktelip, Astana qalasynyń Bilim basqarmasy tarapynan úılestiriledi. Sonymen qatar ata-analar qaýymdastyǵy ókilderi kiretin brakerajdyq komıssııalar da monıtorıng júrgizedi.
Jalpy alǵanda, mektep as mázirin jańartý – bilim berý júıesindegi mańyzdy reformalardyń biri. Ol oqýshylardyń densaýlyǵyn jaqsartýǵa, durys tamaqtaný ádetin qalyptastyrýǵa jáne mekteptegi bilim berý ortasynyń sapasyn arttyrýǵa baǵyttalǵan júıeli shara sanalady.
Aıta keteıik, budan buryn Qazaqstan Qarýly kúshterinde áskerı qyzmetshilerdi tamaqtandyrý júıesin jańǵyrtýǵa baǵyttalǵan jańa standarttar engizilip jatqanyn jazǵanbyz.
