Elorda mektepteriniń kóshbasshy-oqýshylary arasyndaǵy baıqaýdyń fınalısterine qurmet kórsetildi
ASTANA. 12 qarasha. QazAqparat - Búgin «Báıterek» medıa ortalyǵynda ótken brıfıngte elorda mektepteriniń kóshbasshy-oqýshylary arasyndaǵy baıqaýdyń fınalısterine qurmet kórsetildi. Bul týraly astana.kz saıty jazyp otyr. Astana qalasy Bilim basqarmasynyń bastyǵy Ásıma Bımendınanyń aıtýynsha, baıqaý Qazaqstan Respýblıkasynyń Tuńǵysh Prezıdenti Kúni merekesi aıasynda uıymdastyrylǵan.
Eske salaıyq, qalanyń bilim mekemelerinen baıqaýǵa qatysýǵa tilek bildirgen 50 ótinim tústi. Bul - mektep kezeńinde barynsha kóp ball jınaǵan qatysýshylar bolatyn.
«Astana daryny» ortalyǵy 20 qazanda ótken І kezeń (irikteý) test tapsyrý boıynsha is-sharanyń josparyn jasady. Onda Qazaqstan tarıhy men mádenıetinen, geografııa men bıologııadan 100 suraq, sondaı-aq, jalpy oı-óristi aıqyndaıtyn saýaldar boldy. Sonymen qatar ár qatysýshy «Adamda Otan jalǵyz», «Kóshbasshy - bul...», «Patrıot degen kim?» degen taqyryptardyń birine esse jazdy.
«Baıqaýǵa barlyǵy 48 mektep qatysty. Saraptaý komıssııasy test boıynsha joǵary ball jınaǵan jáne óz jumystarynda (esse) dúnıetanymdaryn, mádenı, psıhologııalyq ustanymdaryn tanyta bilgen 20 oqýshyny anyqtady», - dedi «Astana daryny» AǴTO MKK dırektory Maıra Qurmanbaeva.
Onyń aıtýynsha, kelesi kezeń - qatysýshylardy fınaldyq kezeńge daıyndaý. Ol qarasha aıynyń ekinshi onkúndiginde ótedi.
Baıqaýdyń fınaldyq kezeńine Tuńǵysh Prezıdent Kúnine arnalǵan suraqtar engizilip, «Báıge», «Tarıhtaǵy uly tulǵalar», «Blıts-týrnır» jáne «Sheshen» degen bólimderden turady.
