Elorda mektepteriniń as daıyndaý bólmelerine kamera ornatylýy múmkin
ASTANA. QazAqparat - Astana qalasynyń bilim basqarmasy mektepterdiń as daıyndaý bólmesine kamera ornatý múmkindigin qarastyryp jatyr, dep habarlaıdy QazAqparat tilshisi.
Mundaı usynysty tamaqtandyrý boıynsha komıssııa qurýǵa kómektesip júrgen qalalyq ata-analar qoǵamdastyǵy alǵa tartyp otyr.
«Biz keıde tıesili ettiń berilmeı qalǵany týraly aıtamyz. Biraq áýeli mynany túsinýimiz kerek: mektepterdegi tamaqtandyrý jumysy - tutas óndiris ispetti. As daıyndaý bólmesinde jumys tańǵy saǵat 5-6 kezinde bastalyp ketedi. Mekteptiń bir de bir qyzmetkeri tamaq daıyndaýda qansha et salynǵan-salynbaǵanyn tań atpaı kelip baqylap jatpaıdy. Tek vıdeobaqylaý ǵana osy protsesti qadaǵalaýǵa múmkindik berer edi», - dedi qalalyq ata-analar qoǵamdastyǵynyń tóraıymy Tatıana Korshýnova baspasóz máslıhatynda.
Ata-analar, sonymen birge, qoǵamdyq densaýlyq saqtaý komıtetinen mektepte ázirlenetin barlyq tamaq túri boıynsha biryńǵaı tehnologııalyq karta ázirleýdi surap otyr.
«Biz balalardyń nemen tamaqtanyp júrgenin bilgimiz keledi. Eger kotlet berilse, onyń neden jasalǵanyn, qandaı ónimder qosylǵanyn, ákelingenin ata-analar bilip otyrýy kerek», - deıdi ol.
Buǵan qosa, tamaqtandyrý boıynsha komıssııa jumysynda dırektorlar jaýapkershiligin arttyrý kózdeledi. Tatıana Korshýnova keltirgen málimetke súıensek, keı komıssııalar qaǵaz júzinde ǵana jumys isteıdi. Qujattarda tamaqtandyrý boıynsha eshqandaı kemshilik joq dep jazylǵanymen, is júzinde jaǵymsyz jaılardyń kezdesip jatatyny bar. Onyń aıtýynsha, barlyq eskertýler mekteptiń saıtynda jarııalanyp otyrýy tıis.
«Komıssııalar mektepte belsendi jumys júrgizýi tıis. Kez kelgen ata-ana komıssııa quramyna ene alady. Ol úshin ata-ana dırektorǵa ótinim berýi kerek. Eger dırektor ata-anany komıssııa quramyna kirgizýden sebepsiz bas tartsa, onda bizge kelýine bolady. Bizdiń mindetimiz - ár mektepti aralap, ashanasyn tekserý emes. Ár mektepte shynaıy komıssııa jumys istegenin qalaımyz. Ánýar Janǵozın (qalalyq bilim basqarmasynyń basshysy - avt.) aıtqandaı, onǵa tarta ata-ana - komıssııaǵa jeterlik ońtaıly quram», - deıdi Tatıana Korshýnova.
Eske salaıyq, bilim basqarmasy ótkizgen búgingi baspasóz máslıhatynda mektep ashanasynda onlaın tólem júıesin engizý jaıy aıtyldy. Onyń arqasynda ata-analar balasynyń qandaı tamaq ishkenin bilip otyrady.
