Elorda mektepteriniń 98 paıyzy 5 kúndik oqý aptasyna kóshedi

NUR-SULTAN. QazAqparat – Jańa oqý jylynan bastap elordada 148 mektep 5 kúndik oqý aptasyna kóshedi. Bul týraly Oqý-aǵartý mınıstrliginiń baspasóz qyzmeti málim etti, dep habarlaıdy QazAqparat tilshisi.

Mınıstrlik málimetinshe, 216 myńnan astam oqýshy men 21 myńnan astam muǵalim bes kúndik júıege aýysady.

«Bıyl 1 qyrkúıekten bastap 148 mektep 5 kúndik oqý formatyna kóshedi. Bul - bas shahardaǵy barlyq mektepterdiń 98 paıyzy. Al úsh aýysymdy 4 mektep 6 kúndik oqý formatynda qalady. Sondaı-aq elordadaǵy 21 myńnan astam muǵalim úshin senbi demalys kúni bolady», - delingen mınıstrlik taratqan habaralamada.

Eske salaıyq, bul ýaqytqa deıin Oqý-aǵartý mınıstri Ashat Aımaǵambetov muǵalimderdiń bes kúndik jumys aptasyna kóshýin qamtamasyz etýdi tapsyrǵan bolatyn.