Elorda mektepterindegi asxanalarda qolma-qol aqshasyz tólem jasaý júıesi qalaı engiziledi
NUR-SULTAN. QazAqparat - Elordanyń bilim basqarmasy mektep asxanalarynda elektrondy esep aıyrysý júıesin engizýge qatysty túsinikteme berdi. Osy oraıda basqarma qyzmetkerleri áleýmettik jelilerde tarap jatqan aqparatty joqqa shyǵardy, dep xabarlaıdy QazAqparat tilshisi.
Bilim basqarmasynyń strategııa, taldaý jáne tsıfrlyq tehnologııalar bóliminiń basshysy Jazıra Asanovanyń aıtýynsha, áleýmettik jelilerde taralǵan habarlama mátini bilim basqarmasymen kelisilmegen. Qolma-qol aqshasyz tólemderdi iske-asyrý ıdeıasy oqýshylardyń atyna bank kartalaryn tirkeýdi kózdemeıdi.
«Ata-analar tarapynan habarlamaǵa baılanysty túsken shaǵymdardan soń, biz mektepterdegi tamaqtaný júıesine qarasty jetkizýshilermen jáne orta bilim berý uıymdarynyń basshylarymen túsindirme jumystaryn júrgizdik», - deıdi J.Asanova.
Onyń sózine qaraǵanda, kelesi jańa oqý jylynda barlyq mektepterdi qolma-qol aqshasyz tólemder júıesine kóshirý josparlanǵan. Sondaı-aq taǵam daıarlaıtyn bólmelerde beınebaqylaý kameralaryn ornatý jumystary iske asýda.
«Kartalarǵa keletin bolsaq, olar belgili bir banktiń kartasy bolýy mindetti emes, jańadan karta ashýdyń esh qajettiligi joq, tipti bul kartalar banktik emes jaı kartalar da bolýy múmkin. Qolma-qol aqshasyz tólemderdi iske-asyrý ıdeıasy karta nemese mobıldi qosymsha arqyly jumys jasaýdy kózdeıdi. Máselen ata-analar qosymsha arqyly balanyń tamaqtanyp jatqan mázirin kórýge, ashanada aldyn ala tapsyrys jasaýǵa nemese balanyń densaýlyǵyna baılanysty keıbir azyq-túlik túrlerine shekteý qoıýyna múmkindik beredi.
Keleshekte qosymsha arqyly beınebaqylaý kameralardyń jazbalaryn qaraý sııaqty qyzmetterdi qosyp, fýnktsıonaldy jetildirýge bolady», - dep atap kórsetti J.Asanova.
